مولانا فضل الرحمان نے کہا ہے کہ کوئی ملک اب عمران خان کو پاکستان کا نمائندہ مانیں اور نہ ان کو وزیراعظم کی حیثیت دیں۔

ملاقات کے بعد میڈیا سے گفتگو کرتے ہوئے پاکستان ڈیمو کریٹک موومنٹ ( پی ڈی ایم ) کے سربراہ مولانا فضل الرحمان نے کہا کہ ہمارے آئینی قانونی ماہرین کی میٹنگ ہوچکی ہے۔ شہباز شریف سے فون پر رابطہ ہوا جبکہ آصف زرداری تشریف لائے تھے ان سے عدم اعتماد پر بات ہوئی اور مجموعی ملکی سیاسی صورتحال پر بات ہوئی۔

انہوں نے کہا کہ اسلامی برادری سے بھی کہوں گا کہ عمران خان کیخلاف عدم اعتماد کی تحریک حتمی مراحل میں ہے تو کوئی ملک یا ادارہ اب عمران خان کو پاکستان کا نمائندہ نہ مانیں اور نہ ہی ان کو وزیراعظم کی حیثیت دیں۔

پاکستان ڈیمو کریٹک موومنٹ ( پی ڈی ایم ) کے سربراہ کا کہنا تھا کہ تحریک عدم اعتماد کا مسودہ تیار ہے ، ایک دو روز میں عدم اعتماد پیش کرنے کا مرحلہ آچکا ہے۔

مولانا فضل الرحمان کا یہ بھی کہنا تھا کہ ہمارا دعویٰ ہے کہ تحریک کہ کامیابی کیلئے ہمارے پاس اکثریت بھی موجود ہے، عدم اعتماد عمران خان کے خلاف لایا جائے گا۔

چیئرمین پیپلزپارٹی بلاول بھٹو کے انٹرویو سے متعلق ایک سوال کے جواب میں مولانا فضل الرحمان نے کہا کہ وہ سفر میں انہیں شاید حالات کا علم نہیں، شہباز شریف نے چوہدری برادران کو گھر پر کھانے کی دعوت پر بلایا تھا لیکن اس میں وہ نہیں جاسکے۔

پاکستان ڈیمو کریٹک موومنٹ ( پی ڈی ایم ) کے سربراہ مولانا فضل الرحمان کا مزید کہنا تھا کہہمارے پاس چھانگا مانگا اور مری نہیں ہے، قوی امکان ہے تحریک عدم اعتماد میں اتحادی ہمارے ساتھ ہوں گے۔