پاکستان سپر لیگ سیزن 7 کے کامیاب انعقاد نے ایک طرف فرنچائزز کی جھولیاں نوٹوں سے بھر دیں تو دوسری طرف پاکستان کرکٹ بورڈ کی تجوریاں بھی تاریخ ساز منافع کی رقم سے لبا لب بھر گئی ہیں۔

پاکستان کرکٹ بورڈ کے کماؤ پوت پی ایس ایل نے سیزن سات میں منافع کے تاریخ ساز ریکارڈ قائم کر دیئے ہیں، ایک طرف یہ ایونٹ کرکٹ کھیل کی مقبولیت میں اضافہ کا باعث بن رہا ہے تو دوسری جانب نئے کھلاڑیوں کو بھی اپنی صلاحیتوں کے اظہار کا بہترین پلیٹ فارم پیش کر رہا ہے۔

پی ایس ایل کے ایونٹ نے پاکستان میں کرکٹ کو جس انداز سے پیش کیا اس نے شائقین کرکٹ کے دل موہ لئے ہیں ، جبکہ فرنچائزز اور پی سی بی کی تجوریاں پر نہایت اچھے اثرات مرتب ہو رہے ہیں۔

اپنے ایک بیان میں پاکستان کرکٹ بورڈ کے چئیرمین رمیز راجہ کا کہنا ہے کہ لیگ کی تاریخ میں پاکستان کرکٹ بورڈ کو منافع کی مد میں ریکارڈ 71 فی صد اضافی رقم موصول ہوئی ہے۔

رمیز راجہ نے کہا کہ صرف بورڈ ہی نہیں بلکہ تمام فرنچائزز کو بھی اس کے ثمرات حاصل کرنے کا موقع ملا ہے، اور ہر فرنچائز کو تقریباً 90 کروڑ روپے کا منافع ہوا ہے۔

پی ایس ایل کی پاکستان میں بڑھتی ہوئی مقبولیت کو دیکھتے ہوئے رمیز راجہ نے اعلان کیا کہ آئندہ سال اس ایونٹ کو تمام فرنچائزز کے ہوم وینیوز پر لے کر جائیں گے تاکہ زیادہ سے زیادہ شائقین کرکٹ اس سے لطف اندوز ہو سکیں۔

رمیز راجہ کا مزید کہنا تھا کہ پی ایس ایل سیزن 7 کی غیر معمولی مقبولیت میں کراچی اور لاہور کے شائقین کا بھی بہت بڑا ہاتھ ہے جنہوں نے اسٹیڈیم میں آ کر اپنی پسندیدہ فرنچائزز کو سپورٹ کیا۔

رمیز راجہ کا کہنا تھا کہ ایونٹ کے کامیاب انعقاد میں تمام فرنچائزز ، کھلاڑیوں ، طبی عملہ ، قانون نافذ کرنے والے ادارے ، مقامی اور صوبائی انتظامیہ ، کمنٹیٹرز ، براڈ کاسٹنگ عملہ اور گراؤنڈ اسٹاف کی بھی بہت بڑا کردار ہے۔

رمیز راجہ نے مزید کہا کہ اس ایونٹ میں اسپانسرز کے کردار کو نتھی نہیں کیا جا سکتا جن کے تعاون سے یہ ایونٹ کامیابی سے ہمکنار ہوا۔