سعودی ولی عہد و وزیر دفاع شہزادہ محمد بن سلمان نے کہا ہے کہ بہت سے لوگ سعودی عرب کے وژن 2030 کو ناکام ہوتا دیکھنا چاہتے ہیں لیکن ایسا ممکن نہیں ہے۔

سعودی ولی عہد شہزادہ محمد بن سلمان نے امریکی جریدے کو انٹرویو دیتے ہوئے کہا کہ ہمارے ملک کی بنیاد اسلام پر ہے اور ہم اپنے ملک کو بہتر سے بہتر بنانے کی جانب گامزن ہیں، سعودی عرب گزشتہ 7 سالوں کے دوران بہت تبدیل ہوا ہے۔

انہوں نے کہا کہ ملک میں سماجی ترقی، لوگوں کے معیار زندگی کو بہتر بنانے کی کوشش کی گئی ، سعودی عرب تیزی سے ترقی کرتا ہوا ملک ہے اور معاشرتی ترقی بھی جاری ہے تاہم ہم امریکہ یا دبئی بننے کی کوشش نہیں کر رہے۔

سعودی ولی عہد نے کہا کہ ہمارے ملک کی اپنی ایک شناخت ہے، ہماری اپنی معاشی اور ثقافتی بنیادیں ہیں جن کی بنا پر ہم ترقی کرنا چاہتے ہیں ، اسلام ہمیں تمام مذاہب  کا احترام کرنے کی تلقین کرتا ہے۔

 محمد بن سلمان کا کہنا تھا کہ بہت سے لوگ سعودی عرب کے وژن 2030 کو ناکام ہوتا دیکھنا چاہتے ہیں لیکن میں بتانا چاہتا ہوں کہ دنیا کی کوئی طاقت وژن 2030 کو ناکام نہیں کر سکتی ، بلکہ ایسی کوشش کرنے والے زیادہ سے زیادہ اس کی رفتار کو 5 فیصد سے کم کر سکتے ہیں، اس سے زیادہ کچھ نہیں کرسکتے۔

سعودی شہزادے نے کہا کہ ہم کسی اور جگہ قائم منصوبوں کی نقل نہیں کرنا چاہتے بلکہ ہم اپنے منصوبوں میں دنیا کو کوئی نئی چیز دینا چاہتے ہیں ، ہمارے منصوبوں میں سعودی عرب کا رنگ ہے اور یہ منفرد نوعیت کے منصوبے ہیں۔

ولی عہد نے کہا ہے کہ سعودی انویسٹمنٹ فنڈ میں ہمارے پاس پیسہ ہے اور حکومت کا اپنا بجٹ ہے، ہم اپنے وسائل کو بہترین طریقے سے استعمال کرتے ہوئے دنیا کو منفرد منصوبے دے رہے ہیں جب کہ سعودی عرب میں کوئی ایک بھی منصوبہ ایسا نہیں جیسے منسوخ کر دیا ہو یا اس پر کام نہیں ہوا۔