معروف ٹیم چیلسی فٹ بال کلب پر پابندی کے بعد سینٹر بیک کھلاڑی رونالڈ آراؤجو کے حصول کے لئے مشہور کلبز میں جنگ شروع ہو گئی ہے۔

بارسلونا کے سینٹر بیک رونالڈ آراؤجو نے رواں سیزن میں شاندار کارکردگی کا مظاہرہ کیا تھا، رونالڈ نے لالیگا کے 21 میچز میں بارسلونا کی جانب سے تین گول کئے تھے اور اپنے فارورڈز کو بہترین مواقع بھی فراہم کئے۔

رواں سیزن میں رونالڈ آراؤجو کا چیلسی فٹ بال کلب سے معاہدہ لگ بھگ طے تھا، مگر اب پابندی کے بعد کلب انتظامیہ اور خود رونالڈ بھی کشمکش کا شکار ہو چکے ہیں۔

اسپین اور یورپ کے مشہور و معروف فٹ بال کلبز بارسلونا اور مانچسٹر یونائیٹڈ رونالڈ آراؤجو کو کسی اور کی فلائٹ پکڑنے سے روکنے کی بھرپور کوشش کر رہے ہیں۔

بارسلونا اور مانچسٹر یونائیٹڈ جانتے ہیں کہ رونالڈ کی کارکردگی بتدریج بلندی کی جانب گامزن ہے، اور اگر آراؤجو کو مزید بہترین ماحول، سہولیات کے ساتھ پُرکشش معاہدے کے ساتھ جوڑ دیا جائے تو پرفارمنس بوسٹ کر سکتی ہے۔

حالانکہ بلوگرانا اپنے کھلاڑی آراؤجو کو معاہدے میں توسیع کے لئے رضامند کر رہے ہیں، مگر آراؤجو کا انکار ان کے لئے اینٹ کی دیوار ثابت ہو رہا ہے۔

بلوگرانا کے ساتھ رونالڈ آراؤجو کے 1 ملین پونڈز سے بھی کم سالانہ اجرت نے اسے سب سے کم معاوضہ لینے والے کھلاڑیوں کی فہرست میں کھڑا کر رکھا، جس کا رونالڈ کو بھی اندازہ ہے۔

باصلاحیت 23 سالہ رونالڈ کی خدمات سے کم معاوضے میں فائدہ اٹھانے والے بلوگرانا کا کہنا ہے کہ ان کے پاس اتنا بجٹ نہیں ہے کہ وہ رونالڈ کو مطمئن کر سکے۔