واٹس ایپ کا شمار دنیا کی سب سے بڑی میسیجنگ ایپلی کیشنزمیں کیا جاتا ہے۔ جس کی سب سے اہم وجہ یہی ہے کہ یہ اپنے استعمال کنندگان کے لیے یکے بعد دیگرے نت نئے فیچر متعارف کراتی رہتی ہے۔

واٹس ایپ میں ہونے والے تبدیلیوں پر نظر رکھنے والی ٹیک ویب سائٹ وے بی ٹا انفو کے مطابق واٹس ایپ نے ایک بار پھر استعمال کنندگان کی اہم پریشانی کو مد نظر رکھتے بہترین فیچر پیش کردیا ہے جس کی بدولت اب صارفین دو گیگا بائٹس تک کا ڈیٹا منتقل کرنے کے اہل ہوگئے ہیں۔

اس فیچر کی مدد سے استعمال کنندگان ایک فون سے دوسرے فون تک دو جی بی کی گنجائش کی حامل تصاویر، ویڈیوز، دستاویزات اور دیگر فائلز بھیج اور وصول کرسکتے ہیں۔

واٹس ایپ کے اس نئے فیچر نے بڑی آرگنائزیشن اور ذرایع ابلاغ کے اداروں کا اہم مسئلہ بھی حل کردیا ہے کیوں کہ اس سے قبل واٹس ایپ کے ذریعے اتنی بڑی فائل کو بھیجنا ممکن نہیں تھا اور صارفین محض 100 میگابائٹ تک کی فائل بھیجنے کے اہل تھے۔

رپورٹ کے مطابق ابتدائی طور پر یہ سہولت امریکا اور یورپ کے کچھ بی ٹا صارفین کو دی گئی ہے، تاہم امریکا کے علاوہ یورپ اور کینیڈا کے کچھ صارفین بھی اس فیچر سے مستفید ہورہے ہیں۔

واٹس ایپ انتظامیہ کے مطابق یہ فیچر بیک وقت اینڈروئیڈ اورآئی اوایس دونوں آپریٹنگ سسٹم کے لیے جاری کیا گیا ہے۔

واضح رہے کہ اتنی بڑی فائل کو بھیجنے کی سہولت ابھی تک صرف واٹس ایپ میں ہی دی گئی ہے  کیوں کہ امریکی ٹیکنالوجی جائنٹ گوگل کی جی میل بھی 25 جی بی گنجائش تک کی فائل کو سپورٹ کرتی ہے۔

جب کہ اینڈ ٹو اینڈ انکرپشن کی بدولت واٹس ایپ کو محفوظ ترین پلیٹ فارم بھی سمجھا جاتا ہے۔

اینڈ ٹو اینڈ انکرپشن کیا ہے؟

اینڈ ٹو اینڈ انکرپشن دو طرفہ کمیونیکیشن کا ایسا نظام ہے جہاں ایک دوسرے کے ساتھ رابطہ کرنے والے افراد ہی اس پیغام کو دیکھ، سن اور پڑھ سکتے ہیں۔

مثال کے طور پر آپ کا ڈیٹا ایک تالے (لاک) کے ساتھ محفوظ ہے اور پیغام وصول کرنے والے فرد کے پاس ہی اس پیغام کو پڑھنے کی خصوصی چابی (کی) ہے، لہذا مذکورہ فرد/افراد کے علاوہ کوئی دوسرا اس پیغا م کو نہیں پڑھ سکتا۔