واٹس ایپ صارفین کئی برسوں سے جس فیچر کا انتظار کررہے تھے اب وہ اسے استعمال کرسکتے ہیں۔

یہ 2021 کا سب سے بڑا فیچر یعنی بیک وقت متعدد ڈیوائسز میں اس سروس کا استعمال متعدد صارفین کے لئے کچھ شرائط کے ساتھ ممکن ہے۔

یہ فیچر جولائی میں محدود صارفین کے لئے بیٹا ورژن میں پیش کیا گیا تھا مگر اب کمپنی کی خواہش ہے کہ عام صارفین بھی اس فیچر کی آزمائش کریں۔

واٹس ایپ کی اپ ڈیٹ پر نظر رکھنے والی سائٹ WABetaInfo  کے مطابق میسجنگ ایپ میں ایک اپ ڈیٹ کی گئی ہے جس کے ذریعے ملٹی ڈیوائس فیچر کی توسیع دی گئی ہے۔

اس توسیع کے بعد عام صارفین کے لئے کئی ڈیوائسز میں واٹس ایپ استعمال کرنا ممکن ہوگیا ہے۔

اس کے علاوہ ملٹی ڈیوائس فیچر سے صارفین پرائمری ڈیوائس (اسمارٹ فون) سے ہٹ کر 4 ڈیوائسز سے اپنے اکاؤنٹ کو لنک کرسکتے ہیں تاہم اس فیچر میں فی الحال صرف نان فون ڈیوائسز کو ہی ایڈ کیا جاسکتا ہے۔

رپورٹ کے مطابق واٹس میں نئی اپ ڈیٹ کے ذریعے عام صارفین کے لئے ممکن ہوگیا ہے کہ وہ ملٹی ڈیوائس فیچر کو استعمال کرسکیں گے۔

اس فیچر کو استعمال کرنے کے لئے واٹس ایپ کو اوپن کر کے تھری ڈاٹ مینیو پر کلک کریں اور لنکڈ ڈیوائسز کے آپشن پر چلے جائیں وہاں ملٹی ڈیوائس بیٹا کا آپشن ہوگا اس پر کلک کرنے پر مختلف ہدایات ہوں گی اور بتایا جائے گا کہ بیٹا فیچر کو استعمال کرنے کی شرائط کیا ہیں۔

اب نیچے جوائن بیٹا پر کلک کرکے اس فیچر کے ذریعے ڈیوائسز میں فون کنکٹ کیے بغیر واٹس ایپ استعمال کرسکتے ہیں ،ہر ڈیوائس سے صارف واٹس ایپ اکاؤنٹ کو آزادانہ استعمال کرسکیں گے جبکہ اینڈ ٹو اینڈ انکرپشن کا فیچر بھی برقرار رہے گا۔

اس سے قبل رپورٹ کے مطابق صارفین اپنے واٹس ایپ اکاؤنٹ سے بیک وقت 4 ڈیوائسز کو لنک کرسکتے تھے مگر یہ ڈیوائسز واٹس ایپ ویب، واٹس ایپ ڈیسک ٹاپ اور فیس بک پورٹل تک محدود ہوں گی۔

تاہم اس فیچر کی کچھ حدود ہو گی اور بیٹا ٹیسٹرز ان افراد کو میسجز نہیں بھیج سکیں گے جو اپنے فون میں پرانے واٹس ایپ ورژن استعمال کررہے ہوں گے۔

متعدد ڈیوائسز کی سپورٹ کے فیچر کے بارے میں سب سے پہلے جولائی 2019 میں خبر سامنے آئی تھی اور WABetainfo نے اس وقت بتایا تھا کہ واٹس ایپ کی جانب سے ایک نئے پلیٹ فارم (یونیورسل ونڈوز پلیٹ فارم) کی تشکیل پر کام کیا جارہا ہے جو ایک اکاﺅنٹ کو بیک وقت کئی ڈیوائسز پر لاگ ان ہونے میں مدد دے گا۔

پہلے جو رپورٹس سامنے آئی تھی اس کے مطابق ملٹی ڈیوائس سپورٹ کے دوران مین ڈیوائس کو واٹس ایپ ویب کی طرح متحرک انٹرنیٹ کنکشن کی ضرورت بھی نہیں ہوگی۔