چیئرمین سینیٹ محمد صادق سنجرانی نے کہا ہے کہ بلوچستان میں زرعی شعبہ پانی کی قلت کے باعث متاثر ہوا ہے۔

تفصیلات کے مطابق چیئرمین سینیٹ محمد صادق سنجرانی سے بلوچستان کے کاشتکاروں و کسانوں کے وفد کی ملاقات ہوئی ہےجس میں

وفد نے چیئرمین سینیٹ کو بلوچستان میں زرعی شعبے کو درپیش مسائل کے بارے میں آگاہ کیا۔

چیئرمین سینیٹ نے کہا کہ فوڈ سیکورٹی کو یقینی بنانا اور زرعی پیداوار کو بڑھانا انتہائی اہمیت اختیا کر گیا ہے، زراعت کے شعبے میں مروجہ روایتی طریقوں سے ہٹ کر جدید ٹیکنالوجی کو  اپنانا ہوگا تاکہ پانی کی بچت ہو۔

ان کا کہنا تھا کہ ماحول دوست اقدامات کے ذریعے پائیدار پیدواری صلاحیت حاصل کی جا سکتی ہے۔

انہوں نے کہا کہ پانی کے ذخائر میں دن بددن کمی ہو رہی ہے ہمیں اپنے آبپاشی طریقہ کار کو تبدیل کرنا ہوگا، ٓآبپاشی کے جدید طریقوں پر انحصار سے پانی کم سے کم استعمال کر کے زیادہ پیداوار حاصل کی جا سکتی ہے۔

 صادق سنجرانی نے کہا کہ صوبہ بلوچستان میں ٹیوب ویلوں کی بھر مار نے زیر زمین پانی کے ذخائر پر منفی اثرات ڈالے ہیں، ٹیوب ویلوں کی بجائے چھوٹے ڈیموں کی تعمیر اور پانی کے ذخائر بڑھانے پر توجہ دینا ہوگی، عوام، کاشتکاروں اور کسانوں میں اس حوالے سے شعور اُجاگر کرنے کی ضرورت ہے۔

صادق سنجرانی نے کہا کہ حکومت صوبہ بلوچستان کے پانی کے مسئلے کے حل کیلئے مختلف منصوبوں کا آغاز کر چکی ہے، پانی کا منصفانہ استعمال ہم سب کی سماجی ذمہ داری ہے۔

چیئرمین سینیٹ محمد صادق سنجرانی نے مزید کہا کہ زراعت، لائیو اسٹاک کے شعبے میں نجی سطح پر شراکت دار ی کے لئے وسیع گنجائش موجود ہے، بلوچستان میں زرعی شعبے میں سرمایہ کاری کیلئے ماحول  کوساز گار بنانے کی ضرورت ہے جبکہ چیئرمین سینیٹ نے ان مسائل کے حل کیلئے یقینی دہانی کرائی۔

چیئرمین سینیٹ سے کسانوں و کاشتکاروں کی ملاقات  پارلیمنٹ ہاؤس میں ہوئی جس میں رکن قومی اسمبلی نوابزادہ خالد مگسی  بھی موجود تھے ۔