محکمہ موسمیات کی جانب سے آئندہ ہفتے کے دوران ملک بھر میں شدید گرمی کی پیشگوئی کردی گئی ہے۔

اس حوالے سے محکمہ موسمیات کا کہنا ہے کہ ہوا کے زیادہ دباؤ کے باعث اگلے ہفتے کے دوران ملک بھر کے بیشتر علاقوں میں دن کے درجہ حرارت میں تیزی سے اضافہ کا امکان ہے۔

دوسری جانب بالائی پنجاب، اسلام آباد، بالائی خیبرپختونخوا، کشمیر گلگت بلتستان 07 سے 09 ڈگری دن کا درجہ حرارت معمول سے زیادہ کا امکان  ہے۔

اس کے علاوہ بالائی و وسطی سندھ، وسطی و جنوبی پنجاب، بلوچستان 06 سے 08 ڈگری دن کا درجہ حرارت معمول سے زیادہ رہنے کا امکان ہے۔

خیال رہے کہ گزشتہ ہفتے سندھ بھر میں گرمی کی شدت میں اضافہ ریکارڈ کیا گیا تھا جبکہ حیدرآباد میں درجہ حرارت 50 ڈگری سینٹی گریڈ تک پہنچ گیا تھا ۔

واضح رہے کہ کراچی شہر میں آج کم سے کم درجہ حرارت 27 ڈگری سینٹی گریڈ ریکارڈ کیا گیا ہے جبکہ  زیادہ سے زیادہ درجہ حرارت 38 ڈگری سینٹی گریڈ ریکارڈ ہونے کا امکان ہے۔

محکمہ موسمیات نے بتایا کہ شہر میں 25 کلو میٹر فی گھنٹہ کی رفتار سے مغربی ہوا چل رہی ہے، آج مطلع صاف رہے گا جبکہ بارش کا کوئی امکان نہیں ہے۔

ہیٹ اسٹروک:

گرمی کی شدت میں ہر روز اضافہ ریکارڈ کیا جارہا ہے جس کے باعث ہیٹ اسٹروک کے خدشات بڑھنے لگے ہیں۔

اس حوالے سے ماہرین صحت کا کہنا ہے کہ شہریوں کو گرمی سے بچاؤ کے لئے احتیاطی تدابیر اپناتے ہوئے زیادہ سے زیادہ پانی پیئے، دھوپ میں نکلنے سے گریز کریں  اور دھوپ میں نکلتے وقت گیلا تولیا سر پر رکھیں ۔

ماہرین کے مطابق گرم موسم میں ہیٹ اسٹروک کے خدشات بڑھ جاتے ہیں لٰہذا اس موسم میں اپنا خیال رکھیں۔