پاکستان تحریک انصاف کی جانب سے حکومت سے مؤثر انداز سے نمٹنے کے لئے نئی حکمت عملی تیار کرلی گئی ہے۔

 اس حوالے سے ذرائع کا کہنا ہے کہ حکومت کی جانب سے پی ٹی آئی کے جلسوں میں رکاوٹ کے معاملے پر پارٹی نے نیا لائحہ عمل طے کرلیا گیا ہے۔

 ذرائع نے بتایا ہے کہ  پی ٹی آئی کی حکمت عملی کے مطابق کہیں پر بھی آئینی حقوق کی راہ میں رکاوٹ ڈالنے پر قانونی کارروائی کا راستہ اختیار کیا جائے گا جس کی پیش نظر  تمام اضلاع میں اپنی لیگل ٹیموں کو متحرک ہونے کی ہدایت کی ہے ۔

حکمت عملی پر عمل کرتے ہوئے ٹائیگر فورس کو جلسہ گاہ کی تیاریوں اور اندرونی سیکیورٹی پر مامور کیا جائے گا۔

خیال رہے کہ سابق وزیر عظم کو سیالکوٹ جلسے کے اختتام پر سیکیورٹی مسائل کا سامنا کرنا پڑا تھا جس کے بعد وزیرِ اعظم شہباز شریف کی جانب سے چیئرمین پی ٹی آئی عمران خان کو فول پروف سیکیورٹی فراہم کرنے کی ہدایات جاری کردی گئیں ہیں۔

وزیرِ اعظم شہباز نے وزیرِ داخلہ رانا ثناء اللہ کو سابق وزیرِ اعظم کو ہر حوالے سے بہترین سیکیورٹی فراہم کرنے اورفوری طور پر چیف سیکیورٹی آفیسر فراہم کرنے کی بھی ہدایت کی گئی ہے۔

وزیرِ اعظم نے تمام صوبائی حکومتوں کو بھی چیئرمین پی ٹی آئی عمران خان کو جلسے جلوسوں کے دوران سیکیورٹی فراہم کرنے کی ہدایت کی ہے۔

اس حوالے سے وزارت داخلہ کی جانب سے جاری بیان میں بتایا گیا ہے کہ وزارت داخلہ کے احکامات کی روشنی میں سابق وزیراعظم عمران خان کی فُول پروف سکیورٹی کو یقینی بنایا گیا ہے۔