پاکستان تحریک انصاف کے چیئرمین عمران خان کے لانگ مارچ کے اعلان اور ملک کی موجودہ سیاسی و معاشی صورتحال کی پیش نظر وزیراعظم کا آج قوم سے خطاب کرنے کا امکان ہے۔

اس حوالے سے ذرائع کا کہنا ہے کہ وزیراعظم شہباز شریف موجودہ سیاسی صورتحال پر قوم کو اعتماد میں لیں گے۔

خطاب کے دوران وزیراعظم لانگ مارچ اور موجودہ معاشی صورتحال پر بھی عوام کو آگاہ کریں گے۔

ذرائع کے مطابق وزیراعظم کے خطاب کیلیے پی ٹی وی کی ٹیم پی ایم ہاؤس پہنچ گئی ہے۔

عمران خان کا ’حقیقی آزادی مارچ‘:

2 روز قبل  پشاور میں کورکمیٹی کے اجلاس کے بعد پریس کانفرنس کرتے ہوئے سابق وزیراعظم عمران خان نے  25 مئی کو اسلام آباد لانگ مارچ کا اعلان کیا ہے۔

انہوں نے کہا کہ حقیقی آزادی مارچ 25 مئی کو کیا جائے گا اور میں سری نگر ہائی وے پر دوپہر 3 بجے آپ سے ملوں گا، صرف پی ٹی آئی ورکرز کو نہیں بلکہ پوری قوم کودعوت دے رہا ہوں، سب خواتین کوبھی لانگ مارچ میں شرکت کی دعوت دے رہا ہوں۔

عمران خان نے کہا کہ ہمارامطالبہ ہے کہ اسمبلی تحلیل کریں اورالیکشن کا اعلان کریں ،  ،  2 دن پہلے انٹرنیٹ بند کردیا جائے گا جب کہ ہمارے پرامن مارچ میں رکاوٹ ڈالی گئی تو قانونی کارروائی کریں گے۔

حکومت کی حکمت عملی:

پی ٹی آئی کے لانگ مارچ کو ابتدائی طور پر نہ روکنے کا فیصلہ کیا گیا تھا تاہم آج ہونے والے کابینہ اجلاس میں حکومت کی جانب سے عمران خان کو لانگ مارچ کی اجازت نہ دینے کا فیصلہ کیا گیا ہے۔

اس حوالے سے تمام تر اقدامات بھی کیے جارہے ہیں تاہم اسلام آباد میں 2 ماہ کے لئے دفعہ 144 نافذ کردی گئی جبکہ پنجاب اور سندھ میں بھی دفعہ 144 کا  نفاذہے۔