عدالت نے پی ٹی آئی لانگ مارچ کے دوران توڑ پھوڑ کے معاملے میں سابق وزیراعظم کی 10 مقدمات میں 6 جولائی تک ضمانت کی درخواست منظور کر لیں۔

تفصیلات کے مطابق اسلام آباد ڈسٹرکٹ سیشن کی عدالت کے جج کامران بشارت مفتی نے سماعت کرتے ہوئے پولیس کو ریکارڈ سمیت آئندہ سماعت پر طلب کر لیا۔

پی ٹی آئی لانگ مارچ کے دوران توڑ پھوڑ کرنے کے معاملے میں سابق وزیراعظم عمران خان نے ضمانت کے لیےعدالت سے رجوع کیا۔

عمران خان نے 10 مقدمات میں ضمانت کے لیےعدالت سے رجوع کیا جسے عدالت نے 5، 5 ہزار روپے مچلکوں کے عوض منظورکیا۔

سابق وزیراعظم عمران خان کی اسلام آباد ڈسٹرکٹ سیشن جج کی عدالت میں آمد کے موقع پر سیکیورٹی کے انتہائی سخت انتظامات کیے گئے۔

ایف ایٹ کچہری عدالت میں پیشی کے موقع پر اسد عمر اور علی نواز اعوان بھی عمران خان کے ہمراہ تھے۔

سابق وزیراعظم عمران خان نے تھانہ آبپارہ، آئی نائن، کوہسار، کراچی کمپنی، گولڑہ، ترنول کے درج مقدمات میں ضمانت حاصل کی۔

سینٹ الیکشن ویڈیو اسکینڈل کیس

دوسری جانب اسلام آباد ہائی کورٹ میں سینٹ الیکشن ویڈیو اسکینڈل کیس میں پی ٹی آئی رکن اسمبلی فہیم خان کی  فوجداری مقدمہ درج کرنے کے حکم کے خلاف درخواست مسترد کر دی گئی۔

چیف جسٹس اسلام آباد ہائی کورٹ نے الیکشن کمیشن کا فیصلہ درست قراردیتے ہوئے درخواست خارج کی۔

سینیٹ الیکشن میں علی حیدر گیلانی کی ویڈیو سامنے آئی تھی جس پر الیکشن کمیشن نےعلی حیدرگیلانی کیخلاف فوجداری کارروائی کاحکم دیا تھا۔

ویڈیو بنانے والے پی ٹی آئی کے فہیم خان اورکیپٹن (ر) جمیل کیخلاف بھی کارروائی شروع ہوئی تھی۔

اپنے خلاف کارروائی کو فہیم خان نے اسلام آباد ہائی کورٹ میں چیلنج کیا تھا۔