مالی سال 23-2022 کے لیے خیبرپختونخوا کا بجٹ کل پیش کیا جائے گا۔

بجٹ دستاویز کے مطابق آئندہ مالی سال کے لیے صوبے کے بجٹ کا حجم 1 ہزار 3 سوارب روپے سے زائد ہے، بجٹ میں ضم اضلاع کے لیے 222 ارب روپے سے زائد رکھنے کی تجویز دی گئی ہے۔ سرکاری ملازمین کی تنخواہوں کے لیے 4 سو 40 ارب روپے سے زائد اورپینشن کے لیے 105 ارب روپے سے زائد مختص کیے گیے ہیں۔

دستاویزکے مطابق سرکاری ملازمین کی تنخواہوں میں 15 فیصد اضافے کا امکان ہے۔ بجٹ میں صوبے کودہشت گردی کے خلاف جنگ کی مد میں 68 ارب 50 کروڑ روپے سے زائد دیے جائیں گے۔

وفاق سے صوبے کو ٹیکس کی مد میں 5 سو 50 ارب روپے سے زائد جب کہ تیل اورگیس کی رائلٹی کی مد میں 30  ارب روپے سے زائد ملیں گے۔

بجلی کے خالص منافع اوربقایاجات کی مد میں 61 ارب 50  کروڑ روپے سے زائد ملنے کی توقع کی گئی ہے۔

صوبائی ٹیکسوں کی مد میں 80 ارب روپے سے زائد وصول ہوں گے،جب کہ 90 ارب روپے سے زائد کی غیرملکی امداد بھی بجٹ میں شامل ہے۔

دستاویزمیں قبائلی اضلاع کے لیے 200ارب روپے سے زائد کی گرانٹس ملنے کی توقع ظاہر کی گئی ہے۔ قبائلی اضلاع کے لیے 24 ارب روپے رکھنے کی تجویز کے ساتھ ایکسلیریٹیڈ امپلیمینٹیشن پلان کے تحت قبائلی اضلاع میں 35 ارب روپے سے زائد خرچ کیے جائیں گے۔

مالی سال 2022-23 میں قبائلی اضلاع کے لیے 90  ارب روپے سے زائد رکھنے کی تجویز ہے۔ جب کہ دیگر محاصل کا تخمینہ 210 ارب روپے سے زائد لگایا گیا ہے۔

قبائلی اضلاع میں 164 بنیادی مراکزصحت اور 15 سول اسپتالوں بحال کیے جائیں گے، قبائلی اضلاع میں چھوٹے ڈیم تعمیر کیے جائیں گے۔ قبائلی اور بندوبستی اضلاع میں جدید ڈیری فارم قائم کیے جائیں گے۔

قبائلی اضلاع میں پہلی جماعت سے آٹھویں جماعت تک بہترین کارکردگی دکھانے والے طلباء کو وظائف دیے جائیں گے۔

آئندہ مالی سال کے ترقیاتی بجٹ کے لیے350 ارب روپے سے زائد رکھنے کی تجویزدی گئی ہے۔ بندوبستی اضلاع کے لیے 180 ارب روپے سے زائد اور ڈسٹرکٹس اے ڈی پی کے لیے 35 ارب روپے سے زائد رکھنے کی بھی تجویز ہے۔

بجٹ میں 653 جاری منصوبوں کےلیے 90 ارب روپے سے زائد مختص کیے گئے ہیں، سرکاری اسکولوں میں 242 سائنس اورانفارمیشن ٹیکنالوجیز(آئی ٹی) کی لیباریٹریزتعمیر کی جائیں گی، جب کہ خیبرپختون خوا میں ڈویژن کی سطح پر پیتھالوجی لیبزقائم کی جائیں گی۔ پشاوربارنگ سے سوات تک 61 کلو میٹرطویل روڈ تعمیرکیا جائے گا۔

بجٹ دستاویزمیں خیبرمیڈیکل یونیورسٹی حیات آباد میں بون میرو ٹرانسپلنٹ سینٹر قائم کرنے کے لیے بجٹ بھی رکھا گیا ہے۔