الیکشن کمیشن آف پاکستان کی جانب سے عوام کو یقین دہانی کرائی گئی ہے کہ پنجاب کے 20 حلقوں میں ضمنی انتخابات موجودہ فہرست اور حلقہ بندیوں کی بنیاد پر ہورہے ہیں۔

تفصیلات کے مطابق الیکشن کمیشن نے کہا کہ پچھلے چند رو ز سے بعض سیاسی  شخصیات  کی طرف سے ادارے اور چیف الیکشن کمشنر پر بے بنیاد اور حقیقت  کے برعکس  و غیر ذمہ دارانہ  الزامات لگائے گئے ہیں۔

الیکشن کمیشن ان تمام الزامات کی سختی سے تردید اور مذمت کرتا ہے۔

الیکشن کمیشن کے مطابق بلدیاتی  انتخابات میں پولنگ میں رکاوٹ ڈالنے اور غیر قانونی اقدام اٹھانے پر ادارے نے فوری نوٹس لیا اور بااثر لوگوں کے خلاف  بلا امیتاز بھر پور کارروائی بھی کی اور آئندہ بھی تمام انتخابات میں ایسا ہی کرتا رہے گا۔

ادارے کے متعلق یہ  تاثر بھی غلط  پھیلایا جا رہا ہے کہ ووٹرز  کو جان بوجھ کر دوردراز شفٹ کردیا گیا ہے اور حلقہ بندی کو بھی تبدیل کیا گیا ہے۔

الیکشن کمیشن نے بتایا کہ پنجاب کے 20حلقوں  میں شفاف  الیکشن کے لئے  مناسب انتظامات کیے ہوئے ہیں، ایسے انتظامات خیبر پختونخوا اور بلوچستان کے بلدیاتی انتخابات  میں کئے گئے تھے۔

ترجمان کا کہنا ہے کہ پنجاب میں 20 حلقوں  میں ضمنی الیکشن موجودہ انتخابی فہرستوں اور حلقہ بندیوں پر ہورہے ہیں جبکہ 2023 کے عام انتخابات کے لئے غیر حتمی انتخابی فہرستیں ڈسپلے سنٹر ز میں رکھ دی گئی ہیں تاکہ  تمام ووٹرز کے اندراج اور کوائف کی در ستگی کو  یقینی بنایا جا سکے۔

الیکشن کمیشن  ووٹر ز کو یقین  دلاتا ہے  کہ پنجاب کے  20 حلقوں میں  ضمنی الیکشن  شفاف  اور مروجہ قانون کے مطابق ہونگے تاہم خلاف ورزی کرانے والوں کے خلاف قانونی کارروئی  عمل میں لائی جائے گی۔