عمران خان نے کہا ہے کہ سندھ اور پنجاب میں فسطائی حکومتیں غنڈہ گردی کو فروغ دے رہی ہیں۔

چیئرمین پاکستان تحریک انصاف عمران خان کا تحریک انصاف سندھ کے صدر علی زیدی اور سابق گورنر سندھ عمران اسماعیل سے ٹیلی فونک رابطہ ہوا جس میں انہوں نے رکنِ صوبائی اسمبلی شبیر قریشی کی گرفتاری کے حوالے سے تفصیلات معلوم کیں۔

عمران خان نے کہا کہ سندھ اور پنجاب میں فسطائی حکومتیں غنڈہ گردی کو فروغ دے رہی ہیں، کسی مہذب جمہوری ملک میں پولیس کے ذریعے اس قسم کی کارروائیوں کی قطعاً گنجائش نہیں ہوتی۔

چیئرمین پاکستان تحریک انصاف کا کہنا تھا کہ قاتل کو داخلہ کا قلمدان سونپ کر ملک عملاً انارکی کی جانب دھکیلا جارہا ہے۔

ان کا یہ بھی کہنا تھا کہ ضمیرفروشی اور لوٹا کریسی کی بنیادوں پر قائم امپورٹڈ سرکار تحریک انصاف کو میسر عوامی تائید سے خوفزدہ ہے۔

عمران خان کا مزید کہنا تھا کہ اس فسطائی کلچر سے نجات کیلئے حقیقی آزادی کی تحریک کی کامیابی اہم ہے، حقیقی آزادی کی تحریک ہی سے سندھ اور پنجاب غنڈہ راج سے نجات پائیں گے۔

دوسری جانب چیئرمین تحریک انصاف عمران خان کا لاہور سے مقامی رہنما خالد گجر کو بھی ٹیلی فون ہوا جس میں انہوں نے لیگی غنڈوں کی فائرنگ کی زد میں آکر زخمی ہونے والے بیٹے کی خیریت دریافت کی۔