پی ٹی آئی رہنما حماد اظہر نے کہا ہے کہ فیٹف کا معاملہ ملک کے لئے ایک مشکل مرحلہ تھا جس میں بلیک لسٹ ہونے کا خدشہ تھا جو کہ مکمل ہوگیا ہے۔

پریس کانفرنس کرتے ہوئے پی ٹی آئی رہنما حماد اظہر نے کہا کہ فیٹف کی جانب سے کیا جانے والا اعلان اکتوبر سے مارچ تک کی رپورٹ پر کیا گیا ہے کیونکہ فیٹف کو صرف اقدامات نہیں نتائج بھی دیے گئے ہیں۔

حماد اظہر نے کہا کہ ہمیں ہائی رسک انٹری میں رکھا گیا تھا، امکان تھا ہمیں بلیک لسٹ میں ڈال دیا جائے گا لیکن عدلیہ اورسیکیورٹی اداروں نے بہترین کام کیا۔

انہوں نے کہا ساڑھے 3 سال میں ترسیلات زرمیں اضافہ ہوا، بینکنگ نظام اور رقوم کی منتقلی سے متعلق اقدامات کیے گئے ۔

انہوں نے مزید کہا کہ پاکستان نےمشکل ایکشن پلان پرتیزی سےعمل کیا جس کے بعد فیٹف کا فیصلہ توقع کےعین مطابق ہے۔

سابق وفاقی وزیر کا کہنا تھا کہ فیٹف پر دنیا میں سب سے بہترین کام پاکستان میں ہوا جس کے لئے پی ٹی آئی حکومت نے درجنوں قوانین منظور کروائے اور سارےعمل میں ہمارے ہیرو مختلف محکموں کے افسران ہیں۔

حماد اظہر نے بتایا کہ خری دورمیں ہم نے تمام شرائط پر کام مکمل کر کے رپورٹ فیٹف سیکریٹریٹ کوجمع کرائی تھی جس کے متعلق34 ایکشن نکات کا تعین کیاگیا جس میں سے 32 نکات مکمل کیے تھے۔

ان کا کہنا تھا کہ قوم کیلئے خوشی ہے 34 نکات پرعملدرآمد ہوگیا ہے اور مشکل مرحلہ مکمل ہوگیا۔

انہوں نے بتایا کہ پاکستان کو گرے لسٹ سے نکلنے کے بعد بیرونی سرمایہ کاری میں اضافہ ہوگا۔

انہوں نے مزید کہا کہ ہمیں ایف اے ٹی ایف کا مستقل ممبر بننا چاہیے، بھارت بھی ایف اےٹی ایف کا ممبر ہے۔