وزیراعلیٰ خیبرپختونخوا محمود خان نے کہا ہے کہ قدرتی آبی گزرگاہوں پرموجود تجاوزات کا مکمل خاتمہ کرنا ہے۔

تفصیلات کے مطابق وزیراعلیٰ خیبرپختونخوا محمود خان نے سیلاب سے متاثرہ ضلع صوابی کا دورہ کیا اور نقصانات کا جائزہ لیا۔

   وزیراعلیٰ نے  جاں بحق افراد کے لواحقین کے لیے مزید پانچ لاکھ روپے فی کس کا اعلان کیا،مکمل تباہ شدہ گھروں کے لیے چار لاکھ روپے فی گھر جبکہ جزوی طور پر نقصان زدہ گھروں کے لیے ایک لاکھ 60 ہزار روپے فی گھر کا اعلان کیا۔

وزیراعلیٰ نے تباہ شدہ فصلوں کے لئے معاوضے کی رقم پانچ ہزار سے بڑھا کر دس ہزار روپے فی ایکڑ کرنے کا اعلان کیا۔

محمود خان نے کہا کہ آ پ کا وزیراعلیٰ آپ کے ساتھ کھڑا ہے، آپ تنہا نہیں ہیں، صوبائی حکومت متاثرین کی ہر ممکن  مدد کرے گی، ہم مشکل مالی حالات کے باوجود حالات کا مقابلہ کریں گے۔

وزیراعلیٰ خیبرپختونخوا نے کہا کہ عوام الناس کے مسائل کا ازالہ پی ٹی آئی کا منشور اور عمران خان کا وژن ہے، تصویروں کا شوق نہیں،عوام کی خدمت پر یقین رکھتا ہوں، بہتر انداز میں خدمات کی فراہمی پر محکمہ ریلیف اور دیگر متعلقہ اداروں کو خراج تحسین پیش کرتا ہوں۔

انہوں نے کہا کہ قدرتی آبی گزرگاہوں پرموجود تجاوزات کا مکمل خاتمہ کرنا ہے، اگر یہ تجاوزات نہ ہوتے تو اتنا نقصان نہ ہوتا۔

اس کے علاوہ صوبائی کابینہ کے اراکین شہرام ،عبد الکریم ، سابق رکن قومی اسمبلی اسد قیصر اور سرکاری حکام  بھی اس موقع پر موجود تھے۔