بلدیاتی انتخابات کے دوران پرائزئیڈنگ افسر کو تھپڑ مارنے والے 16 گریڈ کے افسر کے خلاف انکوائری کا حکم جاری کردیا گیا ہے۔

سندھ میں بلدیاتی الیکشن کے پہلے مرحلے کے دوران غلام  محمد جونیجو نامی شخص نے پولنگ اسٹیشن میں گھس کر پرائزئیڈنگ افسر کو تھپڑ مارا جو کہ محکمہ صحت میں  سولہ گریڈ کا ملازم  ہے۔

اس حوالے سے محکمہ صحت سندھ کے سیکریٹری کی جانب سے ملازم کے خلاف انکوائری کا حکم دے دیا گیا اور تحقیقات کے لئے تین رکنی کمیٹی بھی تشکیل دے دی گئی ہے۔

محکمہ صحت سندھ کے سیکریٹری کی جانب سے بنائی گئی کمیٹی کو 15 روز میں رپورٹ پیش کرنے کا حکم دیا گیا ہے۔

خیال رہے کہ غلام محمد جونیجو کے خلاف نیب سميت دیگر اداروں میں بھی انکوائری چل رہی ہیں۔

واضح رہے کہ واقعہ تھر کی تحصیل اسلام کوٹ کے گاؤں ماجھٹی کی پولنگ اسٹیشن پر  پیش آیا تھا جس پر ایکشن لیتے ہوئے صوبائی الیکشن کمیشن ڈسٹرکٹ ریٹرننگ افسر سمیت ڈسٹرکٹ مانیٹرنگ افسر اور ڈسٹرکٹ الیکشن کمشنر سے بھی رپورٹ طلب کرلی ہے۔

اس واقعے کی ویڈیو کافی تیزی سے سوشل میڈیا پر وائرل ہوتی نظر آرہی ہے جس میں دیکھا جاسکتا ہے کہ غلام محمد جونیجو پریزائیڈنگ افسر کے ساتھ بحث کرتا ہے اور بعد میں تھپڑ بھی مارتا  ہے۔