سابق وفاقی وزیر عمر ایوب خان نے کہا ہے کہ عوام عمران خان کو ووٹ دینے کے لئے تیار ہے۔

الیکشن کمیشن کے باہر میڈیا سے گفتگو کرتے ہوئے پاکستان تحریک انصاف کے رہنما عمر ایوب نے کہا ہے کہ ضمنی انتخابات انشاء اللہ پاکستان تحریک انصاف ہی جیتے گی۔

انہوں نے کہا کہ موجودہ حکومت ضمنی انتخابات والے حلقوں میں ترقیاتی کام کروارہی ہے، من پسندافرادکی تعینات کیے جارہے ہیں لیکن حکومت کچھ بھی کر لے ہم کامیاب ہوں گے۔

انہوں نے مزید کہا کہ ہم حکومتی ہتھکنڈوں کا ڈٹ کر مقابلہ کررہے ہیں، ان کو دھاندلی نہیں کرنے دیں گے۔

عمر ایوب نے کہا کہ الیکشن کمیشن جعلی ترقیاتی کاموں کورکوائے، سرکاری مشینری کےاستعمال کوبندکرائے اور ان حکومتی اقدامات کا نوٹس لیں۔

ان کا کہنا تھا کہ سرکاری مشینری کا استعمال کر کے ہمارے کارکنان کو ڈرایا، دھمکایا جارہا ہے، عمران خان کےسپاہیوں کوزدوکوب کرنےکی کوشش کی جارہی ہے۔

انہوں نے بتایا کہ حکومتی اقدامات کے خلاف ہم نے اپنا حق استعمال کرتے ہوئے آج پٹیشن جمع کرائی ہے اور قبل از وقت اس لیے پٹیشن دائر کی ہے تاکہ کوئی یہ نہ کہے پہلے تو کوئی اعتراض نہیں تھا۔

انہوں نے واضح کیا کہ پی ٹی اائی کی جانب سے الیکشن کمیشن کو اثرانداز ہونے کے ثبوت بھی پیش کیے ہیں جس میں ڈی پی او جھنگ کے ضمنی انتخاب میں مداخلت کرنے اور راولپنڈی کے افسران کے ن لیگ کے امیدوار کی مہم چلانے کے ثبوت شامل ہیں۔

عمر ایوب کا کہنا تھا کہ حکومت چاہے جو بھی کر لے ضمنی انتخابات انشاء اللہ پاکستان تحریک انصاف ہی جیتے گی۔