سابق وفاقی وزیر فواد چوہدری نے کہا ہے کہ اگر شہباز شریف نے الیکشن کی تاریخ نہیں دی تو انھیں گھر بھیجنا پڑے گا اور شہباز شریف کو گھر بھجوانے کی ہماری تیاری مکمل ہے۔

سابق وفاقی وزیر نے اپنے ایک بیان میں ملک میں موجود سیاسی صورتحال پر تشویش کا اظہار کیا ہے۔

ملک کے معاشی حالات پر شدید تشویش ہے، سمجھ سے باہر ہے نااھلوں کا ٹولہ جو پاکستان پر مسلط کیا گیا معاملات ان کے ہاتھ سے نکل گئے ہیں سیاسی حل کی کوشش ہے لیکن ہمارے پاس وقت زیادہ نہیں ہے اگر شہباز شریف نے الیکشن کی تاریخ نہ دی تو انھیں گھر بھیجنا پڑے گا اس کی ہماری تیاری مکمل ہے

Advertisement

— Ch Fawad Hussain (@fawadchaudhry) July 20, 2022

 فواد چوہدری نے کہا کہ ملک کے معاشی حالات پر شدید تشویش ہے جنہیں سیاسی طور پر حل کرنے کی کوشش کی جارہی ہے لیکن ہمارے پاس وقت زیادہ نہیں ہے۔

انہوں نے کہا کہ غصے اور ضد میں درست فیصلے نہیں ہوتے جس کا ثبوت ہے کہ نااہلوں کا ٹولہ جو پاکستان پر مسلط کیا گیا معاملات ان کے ہاتھ سے نکل گئے ہیں۔

انہوں نے مزید کہا کہ نون لیگ کے وزیر بوکھلاہٹ میں اول فُول بول رہے ہیں ان کو نظرانداز کرنا بہتر ہے۔

فواد چہودری نے کہا کہ ہم اب بھی چاہتے ہیں معاملہ فہمی کا مظاہرہ کیا جائے، انتخابات کی تاریخ دے کر الیکشن کے فریم ورک اور نئے الیکشن کمیشن کی تشکیل پر سر جوڑیں۔

خیال رہے کہ گزشتہ روز پریس کانفرنس کرتے ہوئے انہوں نے کہا  تھا کہ حکومت اس وقت وینٹی لینٹر پر ہے جس کا سوئچ ہمارے ہاتھ میں ہے، اگر ہم وینٹی لینٹر کا سوئچ آف کر دیں تو کیا ہوگا؟

ان کا کہنا تھا کہ حکومت نے اب فیصلہ کرنا ہے کہ وہ کیا چاہتی ہے جس کے لئے اس حکومت کو چند دن کی مہلت دی ہے ۔

انہوں نے کہا کہ شہباز شریف ہمیں عام انتخابات کی تاریخ دیں، انتخاب کا اعلان ہوتے ہی ہم شہباز شریف سے بات کرنے کو تیار ہونگے۔