سعد رفیق نے کہا ہے کہ عمران خان نے ہمیشہ آئین کے ساتھ کھلواڑ کیا ہے۔

وفاقی وزیر برائے ریلوے و ہوا بازی خواجہ سعد رفیق نے وفاقی وزیر برائے اقتصادی امور سردار ایاز صادق کے ہمراہ مشترکہ پریس کانفرنس کرتے ہوئے کہا کہ قوم آج جو بھگت رہی ہے وہ عمران خان کی نالائقیوں کی وجہ سےہے۔

خواجہ سعد رفیق نے کہا کہ 22 کروڑ کا ملک ایک غیر متوازن کی خواہشات کا غلام نہیں ہوسکتا۔ سابق حکومت نے ریلوے کا خسارہ بڑھا دیا جبکہ پی ٹی آئی کے سیاسی مسخروں نے اداروں کو تباہ کر دیا۔

وفاقی وزیر برائے ریلوے کا کہنا تھا کہ ہم چیزوں کو ٹھیک کرنے کی کوشش کر رہے ہیں، اگر غداری ہو رہی تھی تو یہ وزیر اعظم تھا انکوائری کیوں نہیں کروائی؟

خواجہ سعد رفیق نے کہا کہ عثمان بزاد کی کرپشن کے قصے زبان زد عام ہو گئے ہیں، ہم کہتے ہیں نیب کو ختم ہونا چاہیے۔

وفاقی وزیر نے کہا کہ آج جنہیں یہ گالیاں دیتا ہے وہ اس کے محسن ہیں، جب لوگ مشورہ دیتے تھے کہ ملک چلاؤ اپوزیشن کو دیوار سے مت لگاؤ تو سنی نہیں۔

انہوں نے یہ بھی کہا کہ جو آج مہنگائی کا رونا رو رہے ہیں وہ بتائیں، آئی ایم ایف سے معاہدہ کس نے کیا تھا؟ ہم چاہتے تو بھاگ سکتے تھے مگر ریاست بچانے کیلئے بوجھ اٹھایا ہے۔

خواجہ سعد رفیق کا کہنا تھا کہ ریلوے میں 45 ارب کا سالانہ خسارہ چھوڑ کر گیا، جو آدمی دوسروں کو چور کہتا ہے وہ خود چور ہوتا ہے، اس شخص نے ہمیشہ آئین کے ساتھ کھلواڑ کیا ہے۔

وفاقی وزیر برائے ریلوے خواجہ سعد رفیق کا مزید کہنا تھا کہ 90 دن کیلئے تو نگران کے ساتھ کسی نے بات نہیں کرنی تھی، پھر پاکستان کا کیا بنتا؟ سیاست بچ جانی تھی لیکن ریاست نہ بچتی، سی پیک ہم لائے تھے کیوں تم نے رول بیک کیا؟ تمارے حامی تو ہر جگہ موجود ہیں، بنا لیتے نا جوڈیشل کمیشن۔