بنگلہ دیش کے آل راؤنڈر شکیب الحسن کو جوئے کی کمپنی کے ساتھ اپنی شراکت داری کی پوسٹ سوشل میڈیا پر کرنا مہنگا پڑ گیا۔
تفصیلات کے مطابق بنگلہ دیش کی کرکٹ کے سب سے بڑے اسٹار شکیب الحسن ایک بار پھر تنازع میں آگئے ہیں کیونکہ کرکٹ بورڈ ان کی جانب سے اسپورٹس بیٹنگ کمپنی کی توثیق کرنے والی ایک مبینہ سوشل میڈیا پوسٹ کی تحقیقات کرنے والا ہے.
بنگلہ دیش میں موجودہ قوانین کے مطابق جوئے سے متعلق کسی بھی قسم کی سرگرمی کی سہولت اور فروغ پر پابندی ہے۔
واضح رہے کہ 2019 میں آئی سی سی نے شکیب الحسن پر ایک بھارتی بک میکر کی جانب سے بدعنوانی کی اطلاع دینے میں ناکامی کے الزام میں ایک سال کی پابندی لگا دی تھی۔
کرکٹ کی معروف ویب سائٹ نے اپنی رپورٹ میں کہا کہ بنگلہ دیش کرکٹ بورڈ نے شکیب الحسن کی جانب سے جوئے کی ایک کمپنی کے ساتھ اپنی شراکت داری کا اعلان کرنے والی ایک حالیہ سوشل میڈیا پوسٹ کی تحقیقات کرے گا۔
بی سی بی کے صدر نظم الحسن نے اعلان کیا ہے کہ 12000 سے زیادہ رنز اور تقریباً 650 وکٹوں کے ساتھ تقریباً 400 بین الاقوامی میچوں کے تجربہ کار شکیب الحسن کو شوکاز نوٹس جاری کیا جائے گا۔
صدر نظم الحسن نے کہا کہ دو چیزیں ہیں، اول تو اجازت لینے کا کوئی امکان نہیں کیونکہ ہم اجازت نہیں دیں گے۔ اگر سٹہ بازی سے متعلق کوئی چیز ہے تو ہم کوئی اجازت نہیں دیں گے، اور نہ ہی ہم سے کوئی اجازت نہیں لی۔
نظم الحسن نے کہا کہ دوسرا ہمیں یہ جاننا ہے کہ اس نے واقعی کوئی معاہدہ کیا تھا یا نہیں۔
بی سی بی کی گزشتہ روز ہونے والی میٹنگ میں ان کی سوشل میڈیا پوسٹ کی تحقیقات کے حوالے سے بات کی گئی ہے اور بقول بی سی بی صدر شکیب کو شوکاز نوٹس دیا جائے گا اور اس سے بازپرس کی جائے گی۔
نظم الحسن نے باور کرایا کہ یہ نہ صرف کرکٹ بلکہ ملک میں ممنوع ہے اور قانون اس کی اجازت نہیں دیتا ہے۔ یہ ایک سنگین مسئلہ ہے، اگر یہ سچ ہے تو بورڈ ضروری اقدامات کرے گا۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News