توہینِ عدالت کیس میں عمران خان کی 8 ستمبرکوعدالت میں پیشی سے متعلق سرکلر جاری کردیا گیا۔ 

تفصیلات کے مطابق رجسٹراراسلام آباد ہائی کورٹ نے سماعت کے دوران ضابطہ اخلاق کا سرکلر جاری کردیا۔

رجسٹرار آفس کی جانب سے سرکلرمیں کہا گیا کہ کمرہ عدالت نمبر ایک میں انٹری رجسٹرار آفس کے جاری کردہ پاس سے مشروط ہوگی۔ عمران خان کی لیگل ٹیم کے 15 وکلا کمرہ عدالت میں موجود ہو سکیں گے۔

اسلام آباد ہائی کورٹ کے رجسٹرار کی جانب سے سرکلر میں یہ بھی کہا گیا کہ اٹارنی جنرل آفس اور ایڈوکیٹ جنرل آفس سے 15 لا افسران کو اجازت ہوگی۔ تین عدالتی معاونین کو کمرہ عدالت جانے کی اجازت ہوگی۔

توہینِ عدالت کیس سے متعلق جاری کردہ سرکلر میں یہ بھی کہا گیا کہ پندرہ کورٹ رپورٹرز کو کمرہ عدالت میں موجودگی کی اجازت ہوگی۔ ہائی کورٹ اور ڈسٹرکٹ بار کے پانچ پانچ وکلا کو اجازت ہوگی۔ عمران خان کی لیگل ٹیم، وکلا باڈیز، اٹارنی جنرل، ایڈووکیٹ جنرل آفس 5 ستمبر تک لسٹیں جمع کرائیں۔

لسٹوں کی فراہمی کے بعد اسلام آباد ہائی کورٹ کا رجسٹرار آفس پاس جاری کرے گا، کورٹ ڈیکورم کو برقرار رکھنے کے لیے اسلام آباد انتظامیہ اور پولیس سیکیورٹی انتظامات کرے۔ لارجر بنچ 8 ستمبر کو دن اڑھائی بجے کیس کی سماعت کرے گا۔

رجسٹرا آفس نے اسلام آباد ہائی کورٹ جرنلسٹس ایسوسی ایشن کو بھی 15 صحافیوں کی لسٹ جمع کرانے کی ہدایت کی ہے۔