امریکہ کے صدر جو بائیڈن عالمی وبائی مرض کورونا کے انسداد کی نئی ویکسین کی خوراک کل لیں گے۔

تفصیلات کے مطابق وائٹ ہاؤس کے ترجمان کیون مونوز نے اعلان کیا کہ امریکی صدر جو بائیڈن منگل کو کووِڈ 19 وائرس کے لیے ایک تازہ ترین ویکسین لیں گے۔

کیون مونوز نے مزید تاکید کی کہ تمام امریکیوں کو نئی اپ ڈیٹڈ خوراک لینے کی ضرورت ہے۔

وائٹ ہاؤس کی ترجمان کیرن جین پیئر نے جمعرات کو کہا تھا کہ پچھلے ہفتے امریکہ میں صرف 20 ملین لوگوں کو کووڈ 19 کیلئے نئی اپ ڈیٹڈ ویکسین موصول ہوئی ہے اور یہ کافی نہیں ہے۔انہوں نے مزید کہا کہ ہر ایک کو جلد از جلد تازہ ترین ویکسین ملنی چاہیے۔

جبکہ یو ایس سینٹرز فار ڈیزیز کنٹرول اینڈ پریوینشن نے گزشتہ ہفتے کہا تھا کہ گزشتہ ہفتے 45 لاکھ امریکیوں نے تازہ ترین ویکسین حاصل کرلی ہے، یہ موسم خزاں کی ویکسینیشن پروگرام کے آغاز کے بعد سے سب سے بڑا ہفتہ وار اضافہ ہے۔

ویکسینیشن کرانے کی شرح میں یہ اضافہ اس سے قبل کے ہفتہ کے مقابلہ میں 40 فیصد اضافہ ہے۔

واضح رہے امریکہ نے ستمبر میں اپ ڈیٹ شدہ کووِڈ ویکسین کی خوراک جاری کرنا شروع کی تھی جو اصل کورونا وائرس اور اس کی مختلف اقسام سے متعلق ہے۔

امریکی صدر جو بائیڈن کے کورونا وائرس سے متاثر ہونے کی تصدیق جولائی میں ہوئی تھی جب وہ ہلکی علامات میں مبتلا تھے اور ان کے ٹیسٹ کا نتیجہ مثبت آیا تھا، اگست میں دو مرتبہ امریکی صدر کا کورونا ٹیسٹ منفی آیا تھا اور انہوں نے دو ہفتے سے زیادہ وائٹ ہاؤس میں قرنطینہ بھی کیا تھا۔

یہ بات قابل ذکر ہے کہ بیکسلوڈ اینٹی وائرل دوا لینے والے کچھ فیصد لوگوں میں انفیکشن کے دوبارہ ہونے کا معاملہ سامنے آیا ہے.