پاکستان پیپلزپارٹی کے چیئرمین بلاول بھٹو زرداری کا کہنا ہے کہ بار بار الیکشن ملتوی ہونے کی وجہ سے کراچی کے لوگ تنگ آچکے مگر اب اُن کا انتظار ختم ہورہا ہے کیونکہ کراچی میں 15 جنوری کو بلدیاتی الیکشن ہوں گے۔

کراچی میں بلدیاتی انتخابات کی تیاریوں کے حوالے سے پیپلزپارٹی کے ٹکٹ ہولڈرز سے خطاب کرتے ہوئے بلاول بھٹو زرداری نے کہا کہ میں وزیراعلیٰ کو کہتا ہوں وہ ہر سازش کو ناکام بنا کر کراچی اور حیدرآباد میں بلدیاتی انتخابات کروائیں کیونکہ لوگ اپنے مسائل اور مقامی نمائندگی نہ ہونے کی وجہ سے پریشان ہیں ، کراچی والوں نے دیکھا جب اُن کا ایڈمنسٹریٹر تھا تو شہر میں تیزی سے کام ہورہا تھا۔

یہ بھی پڑھیں؛ آج ملک میں بہت مہنگائی ہے، وزیرخارجہ بلاول بھٹو زرداری کا اعتراف

بلاول بھٹو زرداری نے کہا کہ بلدیاتی انتخابات کیلیے ہر حلقے سے نمائندہ کھڑا کیا ہے جس میں تمام قومیتوں کی نمائندگی شامل ہے، پورا کراچی انتخابات کا منتظر ہے اور امیدوار الیکشن مہم چلا چلا کر تھک چکے ہیں، الیکشن لڑنے والوں کو معلوم ہے کہ انتخابات لڑنا کتنا مشکل ہے۔

انہوں نے کہا کہ ہمیں جیت ہار کا کوئی خوف نہیں، جو بھی شفاف طریقے سے کراچی اور حیدرآباد کا انتخاب جیتیں گے ہم اُس کو قبول کریں گے، اگر شکست ہوئی تو بھی منتخب امیدواروں کے ساتھ پیپلزپارٹی کام کرے گی۔

بلاول بھٹو زرداری کا کہنا تھا کہ کراچی کا اگلا میئر جیالا ہوگا جو آج کے پروگرام میں موجود ہے، ماضی میں ہم نے جو بولا کام کرکے دکھایا، ہم کبھی یو ٹرن نہیں لیتے۔