نیوزی لینڈ کیخلاف دو ٹیسٹ میچز کی سیریز کیلئے اعلان کردہ پاکستان کے ٹیسٹ اسکواڈ میں مزید 3 کھلاڑیوں کو شامل کرلیا گیا۔

تفصیلات کے مطابق چیف سلیکٹر شاہد آفریدی کی زیر صدارت سلیکشن کمیٹی کا اجلاس ہوا۔ اجلاس میں کپتان بابراعظم ویڈیو لنک کے ذریعے اجلاس میں شریک ہوئے۔

شاہد آفریدی کا کہنا تھا کہ اجلاس میں اسکواڈ پر اچھی طرح بحث کے بعد اس بات پر اتفاق کیا کہ ہمیں اپنے بولنگ کے شعبے کو مضبوط کرنے کی ضرورت ہے تاکہ خود کو ایک میچ میں 20 وکٹیں لینے کا بہترین موقع فراہم کیا جا سکے۔

Three players added to Pakistan Test squad

Advertisement

More details ➡️ https://t.co/jbaztu926i#PAKvNZ | #TayyariKiwiHai pic.twitter.com/7lXFPzVPTn

— Pakistan Cricket (@TheRealPCB) December 24, 2022

عبوری سلیکشن کمیٹی کے اجلاس میں 3 کھلاڑیوں کو نیوزی لینڈ کے خلاف قومی اسکواڈ میں شامل کرنے کا فیصلہ کیا گیا۔

یہ بھی پڑھیں؛ ملتان ٹیسٹ باضابطہ طور پر کراچی منتقل، شیڈول میں تبدیلی

پاکستان کرکٹ بورڈ کی جانب سے جاری بیان کے مطابق عبوری سلیکشن کمیٹی نے فاسٹ بولر میر حمزہ، آف اسپنر ساجد خان اور فاسٹ بولر شاہنواز دھانی کو اسکواڈ میں شامل کرلیا ہے۔

پی سی بی کا کہنا ہے کہ قائداعظم ٹرافی کے 4 میچز میں میر حمزہ نے 16 وکٹیں حاصل کیں، ساجد خان نے7 میچز میں 21 وکٹیں حاصل کیں جب کہ قومی ٹیم کے ساتھ ہونے کی وجہ سے دھانی صرف 2 میچز کھیل سکے۔

خیال رہے کہ میر حمزہ کا واحد ٹیسٹ اکتوبر 2018 میں ابوظہبی میں آسٹریلیا کے خلاف تھا جبکہ ساجد خان نے ساتواں اور آخری ٹیسٹ اس سال کے شروع میں آسٹریلیا کے خلاف لاہور میں کھیلا تھا۔ وہ اب تک 22 وکٹیں حاصل کر چکے ہیں جن میں گزشتہ سال ڈھاکہ میں بنگلہ دیش کے خلاف 42 رنز پر 8 وکٹیں بھی شامل ہیں۔

دوسری جانب شاہنواز دھانی کا ٹیسٹ ڈیبیو ہونا ابھی باقی ہے ، وہ پاکستان کے لیے دو ون ڈے اور 11 ٹی ٹوئنٹی میچز کھیل چکے ہیں۔

پاکستان ٹیسٹ اسکواڈ

بابر اعظم (کپتان)، عبداللہ شفیق، ابرار احمد، حسن علی، امام الحق، کامران غلام، میر حمزہ، محمد نواز، محمد رضوان، محمد وسیم جونیئر، نسیم شاہ، نعمان علی، ساجد خان، سلمان علی آغا، سرفراز احمد، سعود شکیل، شاہنواز دہانی، شان مسعود اور زاہد محمود شامل ہیں۔

واضح رہے کہ پاکستان اور نیوزی لینڈ کے درمیان پہلا ٹیسٹ پیر سے کراچی میں شروع ہورہا ہے جب کہ دوسرا ٹیسٹ میچ 2 جنوری سے 6 جنوری تک کراچی میں ہی کھیلا جائے گا۔