آئی سی سی نے عالمی کرکٹ کے تینوں فارمیٹس میں بہترین کارکردگی کا مظاہرہ کرنے والے کھلاڑیوں کے نام کا اعلان کر دیا ہے۔

تفصیلات کے مطابق آئی سی سی سر گارفیلڈ گیر سوبرز ٹرافی کے لیے نامزد کھلاڑیوں میں پاکستان کے بابر اعظم کے علاوہ بین اسٹوکس، سکندر رضا اور ٹم ساؤتھی شامل ہیں۔

پاکستان کی تینوں فارمیٹ کے کپتان بابر اعظم نے سال 2022 میں ٹیسٹ، ون ڈے اور ٹی ٹوئنٹی کے 44 میچز کھیلے اور مجموعی طور پر 2598 رنز بنائے۔

سال 2022 بابر اعظم کے ریکارڈ بنانے اور توڑنے کا ایک اور سال تھا، بابر وہ واحد کھلاڑی تھے جنہوں نے کیلنڈر ایئر میں 2000 رنز کا ہندسہ عبور کیا، ان کے 2598 رنز 54.12 کی اوسط سے آئے، جس میں آٹھ سنچریاں اور 17 نصف سنچریاں شامل تھیں۔

گزشتہ سال آئی سی سی ون ڈے پلیئر آف دی ایئر بابر اعظم نے 50 اوور کے فارمیٹ میں بھی اپنی حکمرانی جاری رکھی انہوں نے 9 میچوں میں 679 رنز بنائے۔

یہ بابر اعظم کی مستقل مزاجی کا واضح ثبوت ہے کہ انہوں نے ایم آر ایف ٹائرز آئی سی سی مینز ون ڈے کی پلئیر رینکنگ میں کل 9 میچوں کی 8 اننگز میں 50 یا اس سے زائد رنز بنا ٹاپ پوزیشن پر موجود ہیں۔

ون ڈے کرکٹ میں شاندار کارکردگی کی بدولت وہ ایک مرتبہ پھر آئی سی سی ون ڈے پلئیر آف دی ائیر 2022 کا ایوارڈ جیتنے کی دوڑ میں شامل ہیں۔

پاکستانی بیٹر بابر اعظم نے ٹیسٹ کرکٹ میں بھی ایک زبردست سال کا لطف اٹھایا، باوجود اس کے کہ ٹیم کے نتائج ان کے مطابق نہیں رہے۔ انہوں نے صرف نو میچوں میں 1184 رنز بنائے اور طویل فارمیٹ میں پاکستان کے لیے رنز اسکور کیے۔

وائٹ بال فارمیٹس میں بطور کپتان بابر اعظم کے لیے یہ ایک یادگار سال بھی تھا، پاکستان نے اپنی کھیلی گئی تینوں ون ڈے سیریز جیتیں اور ان تینوں سیریز میں کھیلے گئے نو میچز میں سے صرف ایک میں ناکامی کا سامنا کرنا پڑا۔

پاکستان کی ٹیم نے بابر اعظم کی کپتانی میں 2009 کے بعد ٹی ٹوئنٹی ورلڈ کپ کا فائنل بھی کھیلا.