سابق وزیراعظم عمران خان کا کہنا ہے کہ مجھے ابھی الیکشن ہوتے نظر نہیں آ رہے۔ 

تفصیلات کے مطابق چیئرمین تحریک انصاف عمران خان سے لاہور میں سینئر صحافیوں کے وفد نے ملاقات کی۔ ملاقات کے دوران سابق وزیراعظم عمران خان نے گفتگو کرتے ہوئے کہا کہ ٹیکنوکریٹ حکومت لانے کا شوشہ چھوڑا جا رہا ہے۔

سربراہ تحریک انصاف عمران خان نے کہا کہ حکومت سے زیادہ پیچھے بیٹھے لوگوں کا الیکشن کےلئے راضی ہونا ضروری ہے۔ اس وقت اسٹبلیمنٹ کے ساتھ کوئی رابطہ نہیں ہے۔

عمران خان نے کہا کہ اگرآئندہ عام انتخابات میں کوئی پولیٹیکل انجینئرنگ کی گئی تو نتائج اچھے نہیں ہونگے۔ مشرقی پاکستان میں سب سے بڑی جماعت کا مینڈیٹ تسلیم نہیں کیا گیا تھا۔

چیئرمین پی ٹی آئی نے کہا کہ ابھی مجھے الیکشن ہوتے نظر نہیں آرہا۔ پی ڈی ایم صرف ڈارلنگ روم کی جماعت بن کررہ گئی ہے۔

انھوں نے کہا کہ سابق جنرل قمرجاوید باجوہ نے اس ملک پر بڑا ظلم کیا اور ہم ڈیفالٹ کے قریب کھڑے ہیں۔ ہماری حکومت میں 5 فیصد ڈیفالٹ کا خطرہ تھا جو اب 90 فیصد ہو چکا ہے۔

سابق وزیراعظم نے کہا کہ جنرل باجوہ سے ہماری حکومت کے اچھے ورکنگ ریلیشن رہے۔ جنرل باجوہ کے نزدیک سیاست دانوں کی کرپشن بے معنی تھی۔ نیب قوانین میں ترمیم کر کے 11سو ارب روپے کی کرپشن کے کیسز ختم کر دیے گئے۔

چیئرمین پی ٹی آئی عمران خان نے مذید کہا کہ مسلم لیگ ن اور پیپلزپارٹی کے مفادات بیرون ملک ہیں جب دونوں خاندانوں کے مفادات پاکستان سے نہیں تو ان سے میثاق معشیت کیسے کریں۔

اُن کا کہنا تھا کہ ملک پر قبضہ گروپ کا راج ہے اور جنگل کا قانون ہے۔ قانون کی حکمرانی قائم کیے بغیر پاکستان کے مسائل حل نہیں ہو سکتے۔