پاکستان مسلم لیگ (ن) نے پنجاب اسمبلی کی تحلیل میں کوئی رکاوٹ نہ ڈالنے اور اسمبلی کی تحلیل کے بعد بھر پور تیاری کے ساتھ انتخابی میدان میں اترنے کا فیصلہ کیا ہے۔

 وزیراعظم شہباز شریف کی زیر صدارت پارٹی کے سینئر رہنماوں کے اجلاس کی اندرونی کہانی سامنے آ گئی۔

ذرائع نے بتایا ہے کہ پاکستان مسلم لیگ (ن) نے پنجاب اسمبلی کی تحلیل میں کوئی رکاوٹ نہ ڈالنے کا فیصلہ کیا ہے اور اسمبلی کی تحلیل کے بعد پارٹی کا بھر پور تیاری کے ساتھ انتخابی میدان میں اترنے کا فیصلہ کیا ہے۔

ذرائع کا کہنا تھا کہ اجلاس میں صوبائی اسمبلیوں کے انتخابات آئین میں دئیے گئے وقت کے مطابق کرانے کی تجویز الیکشن کمیشن کو دینے کی تجویز سامنے آئی ہے جب کہ نگران سیٹ کے لئے ناموں کی حتمی منظوری نواز شریف دیں گے۔

نوازشریف اور مریم کی واپسی نگران سیٹ اپ سے مشروط

اجلاس کے شرکاء نے مسلم لیگ (ن) کے قائد نواز شریف اور مریم نواز کی واپسی نگران سیٹ اپ کے قیام سے مشروط کرتے ہوئے  ان کی پاکستان واپسی پر استقبال کی تیاری کرنے کی سنئیر رہنماوں کو ہدایت کردی۔

وطن واپسی کے بعد مریم نواز اور حمزہ شہباز انتخابی مہم کی قیادت کریں گے، مریم نواز جنوبی پنجاب جب کہ حمزہ شہباز بالائی پنجاب میں جلسے کریں گے۔

پارٹی ذرائع نے بتایا کہ پارٹی کے اندر کالی بھیڑوں کو بھی نکالنے کا فیصلہ کیا گیا ہے اور انتخابات کے لئے ٹکٹوں کی تقسیم باقاعدہ انٹرویو کے بعد کی جائے گی جب کہ آئندہ چند روز میں پارٹی کی صورتحال کی رپورٹ شہباز شریف اور نواز شریف کو بجھوائی جائے گی۔

وزیراعظم کی رہائشگاہ سیاسی سرگرمیوں کا مرکز

وزیراعظم شہباز شریف نے 2 روزہ بیرون ملک مصروفیات کے بعد وطن واپسی پر سیاسی مصروفیات شروع کردیں اور ان کی رہائشگاہ سیاسی سرگرمیوں کا مرکز بن گئی۔

وزیراعظم شہباز شریف کی رہائشگاہ پر جاری اجلاس میں وفاقی وزیر خزانہ اسحاق ڈار، وفاقی وزیر ریلوے خواجہ سعد رفیق، وفاقی وزیر داخلہ رانا ثناء اللہ سمیت دیگر وزراء ، معاونین خصوصی ملک احمد خان اور عطاء اللہ تارڑ اور چند ارکان پنجاب اسمبلی شریک ہوئے۔ گورنر پنجاب اور ان کے وکیل منصور عثمان اعوان بھی اجلاس میں شریک ہوئے۔

گورنر پنجاب  محمد بلیغ الرحمان کی وزیراعظم شہباز شریف سے ملاقات کی جس میں وزیراعلی کی پنجاب اسمبلی توڑنے کی ایڈوانس سمیت دیگر اہم امور پر بات ہوئی۔

یہ بھی پڑھیں؛ وزیراعظم دو روزہ دورے پر متحدہ عرب امارات پہنچ گئے

ذرائع نے بتایا کہ اجلاس میں حالیہ سیاسی صورتحال،  پنجاب اسمبلی کی تحلیل پر مشاورت اور آئندہ صوبائی انتخابات سمیت مختلف آئینی و قانونی آپشنز پر غور کیا گیا جب کہ خواجہ سعدرفیق صوبائی پارلیمانی پارٹی کے اجلاسوں سمیت مختلف امور پروزیراعظم کو بریفنگ دی۔

اس سے قبل وزیراعظم شہباز شریف متحدہ عرب امارات سے لاہور کے علامہ اقبال انٹرنیشنل ایئرپورٹ پہنچے ، شہباز شریف کو سخت سکیورٹی میں ایئرپورٹ سے ان کی رہائشگاہ ماڈل ٹاون پہنچایا گیا، وہ 2 سے 3 دن لاہور میں ہی قیام کریں گے اور اس دوران اہم سیاسی شخصیات سے ملاقاتیں بھی کریں گے۔

واضح رہے کہ گزشتہ روز وزیراعلیٰ چوہدری پرویز الہیٰ نے پنجاب اسمبلی کی تحلیل کی سمری گورنر پنجاب کو بھیج دی تھی جس پر گورنر پنجاب وزیراعظم سے مشاورت کے بعد کوئی فیصلہ کریں گے۔