ویٹی کن سٹی میں کیتھیڈرل چرچ کے سابق پوپ 95 سالہ بینیڈکٹ آج انتقال کر گئے۔

برطانوی خبر رساں ادارے کے مطابق ویٹی کن سٹی کے مرکزی کیتھیڈرل چرچ سے گھنٹیاں بجا کر ان کی موت کا اعلان کیا گیا جس کے بعد سینٹ پیٹرز اسکوائر پر بھی گھنٹی بجائی گئی۔

واضح رہے کہ کیتھولک عقیدے سے تعلق رکھنے والے پوپ بینیڈکٹ چھ صدیوں میں پہلے پوپ تھے جنہں نے اپنے عہدے سے استعفیٰ دیا تھا۔

پوپ بینیڈیکٹ نے فروری 2013 میں اپنے استعفیٰ کے بعد ویٹی کن سٹی میں سکونت اختیار کر رکھی تھی، استعفی کے بعد انہوں نے بیرونی دنیا سے خود کو الگ کر لیا تھا اور چرچ کی ایک خانقاہ کی دیواروں میں خود کو محبوس کر لیا تھا۔

پوپ بینیڈکٹ کی آخری رسومات پاپ فرانسس کی زیر نگرانی ویٹی کن سٹی میں ادا کی جائیں گی۔

بحیثیت پوپ بینیڈکٹ نے 8 سال تک اپنی خدمات انجام دیں۔

پوپ بینیڈکٹ گزشتہ کئی ماہ سے علیل تھے پوپ فرانسس کی جانب سے بھی عوام سے ان کی صحتیابی کے لیے دعاؤں کی اپیل کی تھی۔

ان کے جانشین پوپ فرانسس 5 جنوری کو آخری رسومات کی قیادت کریں گے۔

ویٹی کن نے کہا کہ پوپ  کی میت کو 2 جنوری سے سینٹ پیٹرز باسیلیکا میں “وفاداروں کے سلام” کے لیے رکھا جائے گا۔

پوپ بینیڈکٹ کی موت کی خبر بریک ہونے کے بعد اپنے پہلے عوامی تبصروں میں، پوپ فرانسس نے انہیں چرچ کے لیے ایک تحفہ قرار دیتے ہوئے انہیں ایک شریف اور مہربان انسان قرار دیا۔

انگلینڈ اور ویلز میں کیتھولک چرچ کے سربراہ کارڈینل ونسنٹ نکولس نے کہا کہ پوپ بینیڈکٹ 20 ویں صدی کے عظیم پوپ میں سے ایک تھے.