وزیراعلیٰ پنجاب چوہدری پرویز الہیٰ نے پنجاب اسمبلی توڑنے کی سمری پر دستخط کردیے۔ 

تفصیلات کے مطابق چیئرمین پی ٹی آئی عمران خان سے وزیراعلی پنجاب چوہدری پرویز الہی نے اہم ملاقات کی۔ عمران خان وزہراعلی پنجاب کو اعتماد کا ووٹ لینے پر مبارکباد بھی دی۔ اس دوران وزیراعلی پنجاب پرویز الہی نے اسمبلی تحلیل کرنے کی سمری پر دستخط کر دئیے۔

گورنر پنجاب کی تصدیق 

ذرائع کا کہنا ہے کہ وزیر اعلی کی پنجاب کی جانب سے اسمبلی تحلیل کی ایڈوائس پر گورنر پنجاب بلیغ الرحمان نے مسلم لیگ (ن) کی قیادت سے رابطہ کیا ہے۔

ذرائع نے بتایا ہے کہ وزیراعلی کی ایڈوائس پر قانونی و آئینی پہلووں کا جائزہ لینے کے بعد گورنر پنجاب حتمی فیصلہ کریں گے۔

پنجاب اور کے پی میں انتخابات ہونے جارہے ہیں، فواد چوہدری

بعد ازاں پی ٹی آئی کے مرکزی رہنما فواد چوہدری نے بتایا کہ وزیراعلیٰ نے پنجاب اسمبلی توڑنے کی سمری پر دستخط کردیے ہیں اور پنجاب اسمبلی تحلیل کی ایڈوائس گورنر پنجاب کو بھجوا دی گئی ہے۔

انہوں نے کہا کہ اگر گورنر اسمبلی تحلیل نہیں کرتے تو 48 گھنٹے میں اسمبلی خود تحلیل ہوجائے گی جب کہ ہم نگران حکومت کے قیام کے لیے اپوزیشن لیڈر حمزہ شہباز کو خط لکھنے جا رہے ہیں۔

سابق وفاقی وزیر کا کہنا تھا کہ ہم خیبر پختونخوا اسمبلی کو بھی تحلیل کریں گے، پرسوں کے پی اسمبلی تحلیل ہوجائے گی اور 90 دن کے اندر دونوں صوبوں میں انتخابات ہونے جا رہے ہیں۔

پارٹی قیادت اسمبلی تحلیل پر متفق

اس سے قبل چیئرمین پی ٹی آئی عمران خان کی زیر صدارت ہونے والے اجلاس میں پارٹی کی مرکزی قیادت نے پنجاب اسمبلی فوری تحلیل کرنے کی رائے دیدی ۔

پاکستان تحریک انصاف کے چیئرمین عمران خان کی زیر صدارت سینئر قیادت کے اجلاس کی اندرونی کہانی سامنے آ گئی۔ اجلاس میں فیصلہ کیا گیا کہ پنجاب اسمبلی کو فوری تحلیل کیا جائے اور پنجاب اسمبلی کی تحلیل میں اب تاخیر نہیں ہونی چاہیے۔

پی ٹی آئی ذرائع کا کہنا ہے کہ پنجاب اسمبلی کی تحلیل آج ہی متوقع ہے تاہم اس حوالے سے پہلے عمران خان اور پرویز الٰہی کے درمیان ملاقات میں حتمی مشاورت ہوگی۔

یہ بھی پڑھیں؛ پرویز الہیٰ اعتماد کا ووٹ لینے میں کامیاب

ذرائع نے بتایا کہ پنجاب اسمبلی کی تحلیل کا حتمی فیصلہ وزیراعلی پنجاب سے ملاقات کے بعد پی ٹی آئی چیئرمین عمران خان کریں گے، یہ ملاقات کچھ دیر بعد ہو گی، ملاقات کے بعد پنجاب اسمبلی تحلیل کے لیے سمری بھجوائے جانے کا امکان ہے۔

Advertisement

پنجاب اسمبلی میں پاکستان تحریک انصاف کے ڈویژنل کوارڈینیٹرز، چیف وہپ ، پارلیمانی لیڈر کی چئیرمین تحریک انصاف عمران خان سے میٹنگ

پنجاب اسمبلی میں شاندار کامیابی پر چئیرمین عمران خان کی پوری ٹیم کو شاباش

ہماری ٹیم نے کل امپورٹڈ ٹولے کو تاریخی سرپرائز دیا – عمران خان 1/n pic.twitter.com/MqkBTQVeI3

— PTI (@PTIofficial) January 12, 2023

دوسری جانب پنجاب اسمبلی میں پاکستان تحریک انصاف کے ڈویژنل کوارڈینیٹرز، چیف وہپ ، پارلیمانی لیڈر نے عمران خان سے ملاقات کی۔

پنجاب اسمبلی میں شاندار کامیابی پر عمران خان نے پوری ٹیم کو شاباش دیتے ہوئے کہا کہ ہماری ٹیم نے کل امپورٹڈ ٹولے کو تاریخی سرپرائز دیا، ہماری ساری ٹیم شاباش کی مستحق ہے۔

عمران خان کا کہنا تھا کہ جس طرح ہمارے اراکین اسمبلی نے کروڑوں کی آفرز اور دھمکیوں کو بالائے طاق رکھ کر ووٹ ڈالا وہ قابل تحسین ہے، کل بھی کہا تھا کہ “ریڈ لائن” صرف اللہ تعالی کی ذات اور عوام ہی لگاتی اور ہٹاتی ہے۔

ہم فوری طور پر اسمبلی توڑ کر الیکشن میں جائیں گے، عمران خان

سابق وزیراعظم عمران خان نے اراکین اسمبلی کو الیکشن کی تیاری کی ہدایت کرتے ہوئے کہا کہ ہم فوری طور پر اسمبلی توڑ کر الیکشن میں جائیں گے، ملک میں جاری بحرانوں کا حل ایک مضبوط حکومت ہے جو عوامی مینڈیٹ سے آئے۔

خیال رہے کہ وزیراعلیٰ پنجاب چوہدری پرویز الہیٰ اعتماد کا ووٹ لینے میں کامیاب ہوئے ہیں، ایوان میں ووٹنگ کا عمل مکمل ہونے کے بعد  اسپیکر پنجاب اسمبلی نے اعلان کیا کہ پرویز الہیٰ نے 186 ووٹ حاصل کیے ہیں۔

دوسری جانب اپوزیشن نے اپنی واضح شکست دیکھنے کے بعد رائے شماری کے عمل کے دوران ہی احتجاجاً ایوان کی کارروائی کا بائیکاٹ کرتے ہوئے واک آؤٹ کردیا۔