محکمہ موسمیات کا کہنا ہےکہ شہرِقائد کے مختلف علاقوں میں اس وقت وقفے وقفے سے بوندا باندی  کا سلسلہ جاری ہے، آج رات سےکراچی میں مغربی ہوائیں داخل ہوجائیں گی۔

تفصیلات کے مطابق کراچی میں موسم ابر آلود رہے گا اور شہر کے مختلف علاقوں میں اس وقت بوندا باندی کا سلسہ وقفے وقفے سے جاری ہے ۔

محکمہ موسمیات کی رپورٹ کے مطابق کراچی سمیت ملک  بھرمیں مغربی ہواؤں کے سلسلے کی انٹری  متوقع ہے جس کے بعد 17 جنوری تک سندھ بھرمیں سردی کی شدت میں اضافہ ہوجائے گا۔

اس وقت شہرِقائد میں دھند چھائی ہوئی ہے جس کی وجہ سے حد نگاہ 5 کلو میٹر تک محدود رہے گی تاہم مشرق کی سمت سے چلنے والی ہواؤں میں نمی کا تناسب 90 فیصد ریکارڈ کیا گیا ہے ۔آج کم سے کم درجہ حرارت 5  تا 7  ڈگری سینٹی گریڈ رہنے کا امکان ہے۔

ملک کے بالائی علاقوں میں برفباری اور بارش کا امکان  

بلوچستان میں اس وقت مغربی ہوائیں چل رہی ہیں جبکہ وادی زیارت  اورملحقہ علاقوں میں برفباری کا سلسلہ جاری ہے اوراب تک آدھا سے ایک فٹ  تک برف پڑ چکی ہے جس کی وجہ سے کئی مقامات پر رابطہ منقطع اورسڑکیں بند ہوگئی ہیں جبکہ شدید سری کی وجہ سے گیس کی سپلائی  بھی مکمل  طور پر بند ہے۔

کوئٹہ میں گزشتہ رات سےشروع ہونے والی بارش کا سلسلہ ابھی تک جاری ہےجس کی وجہ سے سردی کی شدت میں مزید اضافہ ہوگیا ہے۔

 صوبہ کے بیستر اضلاع  جن میں ژوب،بارکھان،زیارت،قلعہ عبداللہ، قلعہ سیف اللہ، چمن اور مکران کے ساحلی علاقے شامل ہیں میں ہلکی بارش کا امکان ہے جبکہ چاغی، نوشکی، قلات، دالبندین مسلم باغ اور پشین میں بارش  اور برفباری متوقع ہے۔

’ اسلام آباد میں بھی وقفے وقفے سے بارش کا امکان ہے‘ محکمہ موسمیات

محکمہ موسمیات کی رپورٹ کے مطابق اسلام آباد، خطۂ پوٹھوہار، کشمیر، گلگت بلتستان ، خیبر پختو نخوا ، پنجاب اور شمالی/ مغربی بلوچستان میں بارش اور برفباری کا امکان ہے۔

ملتان میں  بھی آج صبح سویرےسے آسمان پر بادل چھائے ہوئے ہیں اور دن میں ہلکی بارش متوقع ہے تاہم آئندہ 24 گھنٹوں کے دوران موسم سرد رہے گا۔