سابق وزیرعظم عمران خان کی سری نگر ہائی وے بلاک کرنے کے کیس میں حفاظتی ضمانت کا تحریری فیصلہ جاری کردیا گیا۔

تفصیلات کے مطابق لاہورہائی کورٹ نے عمران خان کی سری نگر ہائی وے بلاک کرنے کے کیس میں حفاظتی ضمانت کا تحریری فیصلہ جاری کردیا۔ جسٹس علی باقر نجفی اور جسٹس سید شہباز علی رضوی پر مشتمل بنچ نے ایک صفحے کا فیصلہ جاری کیا۔

تحریری فیصلے کے مطابق چیئرمین پی ٹی آئی عمران خان کو دی گئی حفاظتی ضمانت کی معیاد 3 مارچ کے بعد ختم ہو جائے گی، عدالت انصاف کے تقاضے تحت عمران خان کو  حفاظتی ضمانت دینے پر راضی ہے۔

عدالتی فیصلے میں کہا گیا کہ عمران خان نے پولیس پارٹی پر حملہ، سڑک بلاک کرنے اور امن و امان تباہ کرنے کے الزام میں حفاظتی ضمانت دینے کی استدعا کی، وکیل کے مطابق عمران خان پر مقدمہ میں اعانت جرم کا الزام لگایا گیا ہے۔

یہ بھی پڑھیں؛ لاہور ہائی کورٹ میں عمران خان کی پیشی؛ حفاظتی ضمانت منظور

فیصلے میں کہا گیا کہ عمران خان زخمی ہونے کی وجہ سے سنگجانی تھانہ کے اس مقدمہ میں 23 نومبر کو متعلقہ عدالت پیش نہیں ہو سکے تھے، 15  فروری کو انسداددہشت گردی عدالت اسلام آباد نے عمران خان کی عدم پیروی کی بنیاد پر عبوری ضمانت کی درخواست خارج کی۔

عدالتی فیصلے میں مزید کہا گیا کہ  وکلاء کے مطابق عمران خان عبوری ضمانت کیلئے متعلقہ عدالت پیش ہونا چاہتے ہیں، عمران خان کو اس فیصلے کی دستی کاپی معمولی اخراجات کی ادائیگی کے بعد دے دی جائے۔