چوہدری پرویز الہیٰ نے ساتھیوں سمیت پاکستان تحریک انصاف میں شامل ہونے کا اعلان کردیا۔ 

لاہور میں زمان پارک کے باہر میڈیا سے بات کرتے ہوئے تحریک انصاف کے مرکزی رہنما فواد چوہدری نے سابق وزیراعلیٰ پنجاب چوہدری پرویز الہیٰ کے ہمراہ پریس کانفرنس کی۔

اس موقع پر سابق وفاقی وزیر فواد چوہدری نے کہا کہ پرویز الہیٰ اور ان کے ساتھیوں نے ہمارے ساتھ کھڑے رہنے کے لیے بہت قربانیاں دی ہیں، آج سے یہ پی ٹی آئی کا حصہ ہوں گے۔

پرویز الہٰی نے باقاعدہ طور پر پی ٹی آئی کو جوائن کر لیا ہے-@fawadchaudhry pic.twitter.com/aETTAIs5GT

Advertisement

— PTI (@PTIofficial) February 21, 2023

انہوں نے کہا کہ آج کی ملاقات میں ق لیگ کے تمام ایم پیز آج ملاقات میں شریک تھے، مونس الہیٰ اور حسین الہی سے بھی اس دوران بات ہوئی جب کہ مسلم لیگ ق کا پی ٹی آئی کے ساتھ اتحاد اور ضم کرنے کے حوالے سے طویل بحث ہوئی۔

فواد چوہدری نے کہا کہ پرویز الہی نے تحریک انصاف کو جوائن کرنے کا فیصلہ کیا ہے،  ق لیگ کے تمام ایم پیز چوہدری پرویز الہی کے ساتھ کھڑے رہے اور آج سے یہ تحریک انصاف کا حصہ بن گئے ہیں۔

اس موقع پر چوہدری پرویز الہیٰ کا کہنا تھا کہ ہم عمران خان کے شکر گزار ہیں، ہم نے ہر مشکل وقت میں عمران خان اور تحریک انصاف کا ساتھ دیا، ہم نے اپنی وزارت اعلی میں ڈلیور کرکے دکھایا۔

انہوں نے کہا کہ ہم نے عمران خان کے کہنے پر اسمبلی تحلیل کی، ہم ہر وہ کام کریں گے جس میں ملک اور صوبے کا فائدہ ہو، ہمارے کئی ترقیاتی کام اس حکومت نے بند کردئیے ہیں۔

فواد چوہدری نے اعلان کیا کہ ہم نے چوہدری پرویز الہی کو پارٹی کا صدر بنانا ہے، پرویز الہی کو مرکزی صدر بنانے کی سفارش کی گئی ہے۔

عمران خان سے ملاقات 

اس سے قبل سابق وزیراعظم عمران خان سے سابق وزیراعلیٰ پنجاب چوہدری پرویز الہیٰ نے ملاقات کی جس میں تحریک انصاف اور مسلم لیگ ق کی مشترکہ سیاسی صف بندی  سے متعلق اہم امور پر تبادلہ خیال کیا گیا۔

ذرائع نے بتایا کہ عمران خان سے ملاقات سے پہلے چوہدری پرویز الہیٰ نے پارٹی کی سینئیر قیادت سے مشاورتی اجلاس کی صدارت کی جس میں مستقبل کے سیاسی فیصلوں پر غور و خوص کیا گیا۔

ملاقات میں اسد عمر اور فواد چوہدری سمیت پی ٹی آئی کے مرکزی رہنما شریک تھے۔ ملاقات میں مسلم لیگ ق کے 10 سابق اراکین پنجاب اسمبلی اور سینئر رہنما بھی شریک تھے۔

سابق ارکان اسمبلی حافظ عمار یاسر، شجاعت نواز، عبداللہ یوسف وڑائچ، بائو رضوان، ساجد بھٹی، احسان الحق، محمد افضل، باسمہ چوہدری اور خدیجہ عمر فاروقی بھی ملاقات میں شریک تھے۔

اس کے علاوہ موسی الہی، چوہدری مقصود سلہریا، خرم منور منج اور حاجی عمر حبیب بھی ملاقات کا حصہ تھے۔