سابق وزیراعظم اور مسلم لیگ ن کے سینئر نائب صدر شاہد خاقان عباسی نے پارٹی عہدے سے استعفیٰ دیدیا ہے۔

ذرائع کے مطابق شاہد خان عباسی نے پارٹی سنئیر نائب صدر سے استعفی دے دیا ہے، شاہد خاقان عباسی کافی عرصے سے پارٹی پالیسوں سے نالاں تھے۔

ذرائع کا کہنا ہے کہ سینئر نائب صدارت مریم نواز کو دینے اور مشاورت میں شامل نہ کرنے پر شاہد خاقان عباسی قیادت سے ناراض ہیں۔

ن لیگ کے ذرائع نے بتایا کہ مسلم لیگ ن کے سینئر نائب صدر شاہد خاقان عباسی کی پارٹی سے ناراضگی طول پکڑ گئی، ملکی اور پارٹی کے بڑے فیصلوں انکو مسلسل نظر انداز کیا گیا۔

ذرائع کا کہنا ہے کہ شاہد خاقان عباسی کی ناراضگی کی بڑی وجہ پارٹی کے سینئر نائب صدر کے عہدے سے عملی طور پر ہٹاناہے۔

لیگی ذرائع کے مطابق پارٹی قائد نواز شریف نے مریم نواز کو فی الفور شاہد خاقان عباسی کے تحفظات دور کرنے کی ہدایت کردی، ن لیگ میں بااثر سیاسی دھڑا مریم نواز کے ہمراہ شاہد خاقان عباسی سے ملاقات کرے گا۔

ن لیگ کے ذرائع نے مزید بتایا کہ شاہد خاقان عباسی ناراضگی کی وجہ سے مریم کے استقبال کے لئے بھی نہیں گئے، مریم نواز آئندہ چند روز میں شاہد خاقان عباسی سے ملاقات متوقع ہے۔

شاہد خاقان عباسی کا پیغام

ذرائع کے مطابق اس حوالے سے شاہد خاقان عباسی نے اپنے پیغام میں کہا ہے کہ  پارٹی عہدے کا کوئی لالچ نہیں، عہدہ چھوڑنا چاہتا ہوں، پارٹی کو کبھی نہیں چھوڑوں گا۔

ذرائع نے بتایا کہ شاہد خاقان نے کہا ہے کہ مریم نواز کے چیف آرگنائزر بنے پر استعفی دیا ہے اور مفتاح اسماعیل کو وفاقی وزیر خزانہ ہٹانے پر بھی اعتراض تھا۔

ذرائع کے مطابق انکا مزید کہنا ہے کہ سنیئر رہنماؤں کی مشاورت کے بغیر مریم نواز کو عہدہ دیا گیا۔

شاہد خاقان عباسی کا استعفیٰ شہباز شریف کو موصول

دوسری جانب شاہد خاقان عباسی کا استعفیٰ پارٹی صدر شہباز شریف کو موصول ہوگیا ہے۔

اس حوالے سے ذرائع نے بتایا کہ پارٹی صدر شہباز شریف نے استعفیٰ قبول نہیں کیا۔

مریم نواز کا شاہد خاقان عباسی کے تحفظات دور کرنے کا فیصلہ

پاکستان مسلم لیگ ن کی سینئر نائب صدر اور چیف آرگنائزر مریم نواز  نے شاہد خاقان عباسی کے تحفظات دور کرنے کا فیصلہ کیا ہے۔

مریم نواز نے کہا ہے کہ شاہد خاقان عباسی ہماری پارٹی کا اثاثہ ہیں، جلد ملاقات کرکے شاہد خاقان عباسی کے تحفظات دور کروں گی۔