سابق وزیراعظم  عمران خان اور سابق وزیراعلیٰ پنجاب چوہدری پرویز الٰہی کی جانب سے مسلم لیگ ن کی عدلیہ مخالف مہم کی مذمت کی گئی ہے۔

تفصیلات کے مطابق چیئرمین تحریک انصاف عمران خان سے سابق وزیراعلیٰ پنجاب چوہدری پرویزالٰہی کی ملاقات ہوئی ہے۔

ملاقات کے دوران موجودہ سیاسی صورتحال، جیل بھرو تحریک اور عام انتخابات کے امور پر تبادلہ خیال  کیا گیا جبکہ چوہدری پرویزالٰہی کی جانب سے عمران خان کی اعلان کردہ جیل بھرو تحریک کی مکمل حمایت  کی گئی ہے۔

یہ بھی پڑھیں: مسلم لیگ ن کا آڈیو ڈرامہ بری طرح فلاپ ہوچکا ہے، پرویزالہٰی

اس موقع پر دونوں رہنماؤں نے  ن لیگ کی عدلیہ مخالف مہم کی مذمت کرتے ہوئے کہا ہے کہ مسلم لیگ ن اپنی روایت کے مطابق عدلیہ پر حملہ آور ہے اور لاہور ہائیکورٹ کے فیصلے پر بھی عمل نہیں کیا جا رہا ہے۔

حکمران اتحاد عمران خان سے خوفزدہ ہے

چوہدری پرویز الٰہی کا کہنا تھا کہ حکمران اتحاد عمران خان سے خوفزدہ ہے،عمران خان کی عوامی مقبولیت سے خوفزدہ پی ڈی ایم ٹولہ الیکشن سے بھاگ کر آئین شکنی کا مرتکب ہو رہا ہے۔

انہوں نے کہا کہ عمران خان پاکستانی عوام کیلئے امید کی روشنی ہیں تاہم الیکشن کمیشن اور گورنرز یاد رکھیں آئین شکنی پر آئین ہی ان کے خلاف راستہ لے گا۔

انہوں نے مزید کہا کہ آج کے سیاسی فرعونوں کے خلاف قوم نے خوف کے بت توڑ دیئے ہیں اور قوم عمران خان کی ہر کال پر لبیک کہنے کو تیار ہے۔

نااہل حکمران ٹولہ الیکشن سے خوفزدہ ہوکر انتقامی کارروائیوں پر اتر آیا ہے

اس موقع پر عمران خان کا کہنا تھا کہ حکمران آئین کو مان رہے ہیں نہ عدالتی فیصلے تسلیم کر رہے ہیں، پی ٹی آئی کی قیادت اور کارکنوں کے خلاف جھوٹے مقدمات درج کئے جا رہے ہیں۔

انہوں نے کہا کہ نااہل حکمران ٹولہ الیکشن سے خوفزدہ ہوکر انتقامی کارروائیوں پر اتر آیا ہے تاہم اب جیل بھرو تحریک کے تحت ملک بھر سے پارٹی رہنما، کارکن اور عوام رضاکارانہ گرفتاریاں دیں گے۔

انہوں نے مزید کہا کہنااہل ٹولے نے پہلے ملکی معیشت کو تباہ کیا اب آئین کی پامالی کی جا رہی ہے،یہ حکمران مزید جتنے دن اقتدار میں رہیں گے ملک کو اتنا ہی زیادہ نقصان ہو گا،ملک کو درپیش معاشی بحران سے نکالنے کیلئے الیکشن ناگزیر ہیں۔