چینی صدر نے پاکستان کی حمایت میں بڑا اعلان کرتے ہوئے کہا کہ وہ مشکل وقت میں پاکستان کی بھرپور مدد جاری رکھے گا۔

سرکاری خبر رساں ادارے کی خبر کے مطابق چین کے صدر شی جن پنگ نے کہا ہے کہ وہ دہشت گردی کے خلاف جنگ میں پاکستان کی حمایت جاری رکھے گا۔

چینی صدر شی جن پنگ نے پشاور کی مسجد میں ہونے والے خودکش دھماکے کی سخت مذمت کی اور شہید ہونے والوں کے لیے اظہار تعزیت کی۔

چین کے صدر نے پاکستان میں انسداد دہشت گردی کے لیے اپنی بھرپور حمایت جاری رکھنے اور تعاون کو مزید بڑھانے کا اعلان بھی کیا۔

سرکاری خبر رساں اداے کے مطابق چین کے صدر شی جن پنگ نے وزیر اعظم شہباز شریف کے نام اپنے ایک تعزیتی پیغام میں پشاور میں دہشت گردی کے واقعے میں شہید ہونے والوں کے لواحقین سے تعزیت کی۔

چین کے صدر شی جن پنگ نے پشاور دھماکے میں زخمی ہونے والوں کی جلد صحتیابی کے لیے نیک تمناؤں کا اظہار کیا۔

اپنے تعزیتی پیغام میں چین کے صدر نے کہا کہ ان کا ملک انسداد دہشت گردی کے قومی ایکشن پلان کو فروغ دینے کے حق میں ہے، اور پاکستان میں سماجی استحکام کو برقرار رکھنے کے لیے ہر ممکن تعاون کرے گا۔

چینی صدر نے کہا کہ چین پاکستانی عوام کی جان و مال کی حفاظت کے لیے پاکستان کی بھرپور حمایت جاری رکھے گا۔

چین کے صدر نے اپنے پیغام میں مزید کہا ہے کہ وہ پاکستان کے ساتھ انسداد دہشت گردی میں تعاون کو مزید گہرا کرنے کے لیے تیار ہے۔