جاپان کے اسپتالوں میں کورونا سے ہونے والی اموات میں بتدریج اضافہ دیکھنے میں آیا ہے جو خطرناک ہے۔

برطانوی خبر رساں ادارے کی خبر کے مطابق جاپان میں کورونا کی اموات میں اضافے کی بڑی وجہ کم استثنیٰ اور معمر افراد کی بڑھتی ہوئی آبادی ہے جن میں قوت مدافعت نوجوانوں کی نسبت کم ہوتی ہے۔

واضح رہے کہ جاپان نے کورونا کے خلاف انتہائی سخت اقدامات کیے تھے جس کی وجہ سے ملک میں اس موذی مرض سے ہونے والی اموات دیگر ممالک کی نسبت انتہائی کم تھیں۔

آکسفورڈ یونیورسٹی کے ڈیٹا کے مطابق، اس سال 20 جنوری کو جاپان نے کورونا اموات میں برطانیہ، امریکہ اور جنوبی کوریا کو پیچھے چھوڑتے ہوئے اب تک کی بلند ترین سطح کو چھو لیا ہے۔

جاپان 2020 سے پچھلے سال جون کے وسط تک غیر ملکی مسافروں کے لیے بڑی حد تک بند تھا، اس نے اپنی سرحدوں کو احتیاط سے کھولا۔

سرحدیں کھولنے کے باوجود مسافروں کو پیکیج ٹور کا حصہ بننا پڑتا تھا، میڈیکل انشورنس خریدنا پڑتا تھا اور تمام عوامی مقامات پر ماسک لگانا پڑتا تھا۔

کچھ اسکول کے بچوں نے دو سال سے زیادہ خاموشی سے کھانا کھایا کیونکہ اسکولوں نے دوپہر کے کھانے کے وقت بات چیت پر پابندی عائد کردی تھی۔

جاپان کے مقامی ماہرین صحت نے برطانوی خبر رساں ادارے کو بتایا کہ جیسے جیسے کورونا پابندیوں میں نرمی کی گئی تو کم قوت مدافعت والے افراد اس کا زیادہ شکار بنے۔

جاپانی ماہرین صحت نے کہا کہ تازہ ترین کوورونا اموات میں سے زیادہ تر عمر رسیدہ افراد ہیں جن کی قوت مدافعت کم ہوتی ہے۔ یہ اموات کی ابتدائی رفتار سے متصادم ہے جو نمونیا کی وجہ سے تھیں اور اکثر ان کا انتہائی نگہداشت میں علاج کیا جاتا تھا۔

جاپان کے معروف وائرلوجسٹ ہیتوشی اوشیتانی کہتے ہیں کہ کورونا صرف ایک وجہ ہے اور علاج کے ذریعے ان اموات کو روکنا بھی مشکل ہے۔