برطانوی خبر رساں ادارے نے دعویٰ کیا ہے کہ خالصتان کے حامی سکھ رہنما امرت پال سنگھ کو پولیس گرفتار کرنے میں ناکام ہوئی ہے۔

تفصیلات کے مطابق چار روز قبل بھارتی ریاست پنجاب میں پولیس نے سکھ رہنما امرت پال سنگھ کی گرفتاری ظاہر کی تھی، جس کے ردعمل میں سکھ برادری نے شدید احتجاج کیا تھا۔

گزشتہ روز انگلینڈ میں بھارتی کونسل خانے پر سکھوں نے امرت پال سنگھ کی رہائی کے لیے احتجاج کیا تھا اور سکھوں نے کونسل خانے پر لگے بھارتی پرچم کی جگہ خالصتان کا پرچم لہرا دیا تھا۔

آج برطانوی خبر رساں ادارے نے دعویٰ کیا ہے کہ چار روز قبل بھارتی پولیس امرت پال سنگھ کو گرفتار کرنے میں ناکام ہو گئی تھی، اور اس کی گرفتاری کے لیے شمالی پنجاب میں آپریشن جاری ہے۔

برطانوی خبر رساں ادارے کی خبر کے مطابق سکھ رہنما امرت پال سنگھ کی گرفتاری کے لیے بھارتی حکومت نے 100 سے زیادہ افراد کو گرفتار کر لیا ہے۔

امرت پال سنگھ کی گرفتاری کے لیے بھارتی ریاست پنجاب کے شمالی حصوں میں انٹرنیٹ کی سروس چار روز سے بند ہے جس کی وجہ سے لاکھوں شہریوں کو رابطے کے لیے شدید مشکلات کا سامنا کرنا پڑ رہا ہے۔

بھارتی پنجاب کے وزیر اعلیٰ بھگونت مان نے کہا کہ پنجاب میں ملک دشمن جذبات پھیلانے والوں کے خلاف سخت کارروائی کی جائے گی۔

واضح رہے کہ سکھ رہنما امرت پال سنگھ بھارتی ریاست پنجاب میں تیزی سے مقبول ہو رہے ہیں، ان کے بیانات سن کر لوگوں کو پنجاب میں 1980 کی دہائی کی شورش یاد آ گئی ہے جس میں بھارتی حکومت نے ہزاروں سکھوں کا قتل عام کیا تھا۔

بتایا جا رہا ہے کہ آج پنجاب کی ہائی کورٹ نے انتظامیہ سے مطالبہ کیا ہے کہ جب ہزاروں پولیس اہلکار اسے تلاش کر رہی تھی تو وہ گرفتاری سے فرار ہونے میں کیسے کامیاب ہوا۔

ہائی کورٹ نے بھارتی پولیس کی سخت سرزش کی اور کہا کہ 80 ہزار پولیس اہلکار بھی ایک شخص کو گرفتار نہیں کر سکے یہ انٹیلی جنس کی بھی ناکامی ہے، عدالت نے چار دن میں جاری آپریشن کی رپورٹ عدالت میں پیش کرنے کا حکم دیا ہے۔

بھارتی حکومت کا جھوٹ اس وقت سامنے آیا جب عدالت وارث پنجاب دے نامی تنظیم کے قانونی مشیر کی درخواست پر سماعت کر رہی تھی جس میں پولیس پر امرت پال سنگھ کو غیر قانونی طور پر گرفتار کرنے کا الزام لگایا گیا۔

عدال میں حکومت نے کہا کہ حکومت امرت پال سنگھ کے علاوہ دیگر تمام ملزمان کو گرفتار کرنے میں کامیاب ہو گئی ہے۔

پولیس کا کہنا ہے امرت پال سنگھ کے 6 قریبی ساتھیوں سمیت ان کے چچا کو بھی گرفتار کیا گیا ہے، ان میں چار افراد کو شمالی مشرقی ریاست آسام کی ایک جیل میں بھیج دیا گیا ہے۔