نورعالم خان کی زیر صدارت پارلیمنٹ کی پبلک اکاؤنٹس کمیٹی کا  اجلاس ہوا جس میں وزارت آبی وسائل کی آڈٹ رپورٹ 2019-20 کا جائزہ لیا گیا۔ 

پی اے سی نے سیکریٹری آبی وسائل کی اجلاس میں عدم شرکت پر اظہار برہمی کیا۔ نورعالم خان نے کہا کہ سیکریٹری آبی وسائل چوتھی پانچویں بار اجلاس میں شریک نہیں ہوئے۔

حکام وزارت آبی وسائل نے بتایا کہ سیکریٹری آبی وسائل بیرون ملک دورے پر ہیں، چیئرمین پی اے سی نے کہا کہ پرنسپل اکاونٹنگ افسر کی غیر موجودگی میں ہمیں یہاں بیٹھنے کا کوئی فائدہ نہیں۔ وزارت آبی وسائل کے اربوں روپے کے 12 منصوبے تاخیر کا شکار ہیں۔

نور عالم خان نے کہا کہ تاخیر کی وجہ سے منصوبوں کی لاگت میں نمایاں اضافہ ہوگیا، نیلم جہلم، سوکھی کناری سمیت کسی منصوبے کی انکوائری رپورٹ مکمل نہیں کی گئی۔ انکوائری رپورٹس آنے میں تین تین سال لگ جاتے ہیں۔

چیئرمین پی اے سی نے کہا کہ آبی وسائل کے منصوبے 14 سے 22 سال تک تاخیر کا شکار ہوتے ہیں۔

پبلک اکاؤنٹس کمیٹی نے 8 اگست تک تمام انکوائری رپورٹس طلب کر لیں۔

پی اے سی نے تمام ڈیفنس ڈیلزکی تفصیلات ویب سائٹ سے ہٹانے کی ہدایت بھی کی، نورعالم خان نے کہا کہ بھارت پاکستان کی ڈیفنس ڈیلز کو خراب کرنے میں ملوث ہے۔ میزائل، اسلحہ، جہاز یا ان کے پرزہ جات کہاں سے خریدے جاتے ہیں، تفصیلات ویب پر نہ ڈالی جائیں۔

چیئرمین پی اے سی نے کہا کہ بھارت متعلقہ کمپنیوں کے ساتھ مل کر ڈیل ختم کراتا ہے۔ اجلاس میں اسپیکر قومی اسمبلی اور آڈیٹر جنرل آف پاکستان کو بھی خط لکھنے کا فیصلہ کیا گیا۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں۔