سابق کپتان وقار یونس نے ایشیاکپ کے سپر فور مرحلے میں بھارت کے خلاف شاہین آفریدی کی کارکردگی کو تنقید کا نشانہ بنایا ہے۔

بھارت کے خلاف پاکستان نے ٹاس جیت کر پہلے بولنگ کرنے کا فیصلہ کیا لیکن بولرز کو ابتدا ہی سے مشکلات کا سامنا کرنا پڑا۔

بھارتی کپتان نے پہلے ہی اوور میں شاہین آفریدی کو چھکا رسید کردیا جس کے بعد شاہین آفریدی جیسے اپنی لائن اور لینتھ ہی بھول گئے اور وہ جدوجہد کرتے دکھائی دیے۔

شاہین کے بولنگ پارٹنر نسیم شاہ نے جارحانہ بولنگ کی لیکن شاہین خود معمول کی فارم سے بہت دور دکھائی دیے۔

شاہین آفریدی کو دوسرے اوور میں شبھمن گل نے لگاتار تین چوکے لگائے اور اگلے اوور میں ایک مرتبہ پھر شبھمن گل نے دوبارہ تین چوکے لگادیے جس کے بعد انہوں نے مجموعی طور پر اپنے پہلے تین اوورز میں 31 رنز دیے۔

سابق کپتان وقار یونس نے شاہین آفریدی کے ابتدائی اسپیل پر مایوسی کا اظہار کرتے ہوئے کہا کہ بائیں ہاتھ کے پیسر نے نئی گیند پر بہت زیادہ کوشش کی لیکن وہ ناکام رہے۔

انہوں نے کہا کہ پاکستان ٹیم میں کسی بھی بولر نے شارٹ گیند اور باؤنسر کرنے کی کوشش نہیں کی، اگر آپ ٹھیک طرح سے گیند بازی کرتے تو مخالف بلے بازوں کو پریشان کردیتے۔

ان کا کہنا تھا کہ پچھلے میچ میں بھی اگرچہ انہوں نے شاندار 10 اوورز کروائے تھے لیکن وہ اس میں بھی آف کلر دکھائی دیے اور آج تو انہیں بہت آسانی سے باؤنڈریز لگیں۔

واضح رہے کہ ایشیاکپ سپر فور مرحلے کے ہائی وولٹیج میچ میں پاکستان کو بھارت کے ہاتھوں 228 رنز سے بدترین شکست کا سامنا کرنا پڑا ہے جب کہ شاہین آفریدی نے 10 اوورز میں 79 رنز دے کر ایک وکٹ حاصل کی۔

اگر آپ حالاتِ حاضرہ سے باخبر رہنا چاہتے ہیں تو ہمارے فیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے کو سبسکرائب کریں   اور بیل آئیکن پر کلک کریں