اسرائیلی وزیر دفاع نے غزہ کی مکمل ناکہ بندی کا حکم دیتے ہوئے فوری طور پر بجلی معطل کرنے کے احکامات جاری کردیے ہیں۔ 

غیر ملکی خبررساں ادارے کی رپورٹ کے مطابق اسرائیل کے وزیر دفاع یوو گیلنٹ نے غزہ کی مکمل ناکہ بندی کا حکم دیتے ہوئے غزہ کو بجلی فراہم کرنے والی کمپنی کو فوری طور پر بجلی کاٹنے کے احکامات جاری کردیے ہیں جس کی تصدیق خود وزیر دفاع نے ایک بیان میں کی۔

اسرائیلی وزیر دفاع کی جانب سے غزہ کے لیے کھانے پینے کی اشیاء اور ایندھن کی سپلائی روکنے کے احکامات بھی جاری کیے گئے ہیں۔

دوسری جانب فلسطینی وزارت صحت کے مطابق اسرائیل کی جانب سے اقوام متحدہ کے اسکول سمیت دیگر عوامی مقامات کو نشانہ بنایا گیا جس کے نتیجے مین غزہ میں شہید ہونے والوں کی تعداد 500 سے زائد ہوگئی ہے اور 2700 سے زائد فلسطینی زخمی ہیں۔

خیال رہے کہ اقوام متحدہ نے اس بات کی تصدیق کی ہے کہ اسرائیل اور حماس کے درمیان جنگ کے بعد غزہ میں تقریباً ایک لاکھ 23 ہزار سے زائد لوگ بے گھر ہوچکے ہیں جب کہ غزہ میں تقریباً 73 ہزار سے زائد افراد نے اسکولوں میں پناہ لی ہوئی ہے۔

اقوام متحدہ کے انسانی حقوق کے ادارے کے ترجمان نے بتایا کہ غزہ پر اسرائیلی حملے سے قبل یہاں 23 لاکھ افراد رہائش پذیر تھے جنہوں نے گھروں پر حملے کے خوف سے اپنے گھر چھوڑ دیے ہیں۔

واضح رہے کہ اسرائیلی اخبار نے دعویٰ کیا ہے کہ فلسطینی مزاحمت پسند تنظیم حماس کے حملوں میں 1000 سے زائد اسرائیلی ہلاک ہوئے ہیں۔