قومی کرکٹ ٹیم کے اوپننگ بلے باز عبداللہ شفیق نے آسٹریلیا کے اوپنر ڈیوڈ وارنر کا کیچ چھوڑنے کی وجہ بتادی۔ 

میلبرن کرکٹ گراؤنڈ میں پاکستان اور آسٹریلیا کے درمیان تین ٹیسٹ میچوں پر مشتمل سیریز کا دوسرا ٹیسٹ جاری ہے جہاں کھیل کے دوسرے روز کا اختتام ہوگیا۔

دوسرے دن کے اختتام پر آسٹریلیا کی پوری ٹیم 318 رنز پر ڈھیر ہوگئی جس کے بعد قومی ٹیم کے 6 کھلاڑی بھی 164 رنز بنالیے تھے جب کہ اوپننگ بلے باز عبداللہ شفیق نے 62 رنز کی اننگز کھیلی۔ انہوں نے ٹیسٹ کیریئر کی پانچویں نصف سنچری بنائی ہے جبکہ بابر اعظم ایک رن بنا بولڈ ہو گئے تھے۔

کھیل کے اختتام پر میڈیا سے گفتگو کرتے ہوئے عبداللہ شفیق نے کہا کہ بدقسمتی سے ڈیوڈ وارنر کا اہم کیچ ڈراپ ہوا، اگر تھام لیتا تو آسٹریلیا کی اننگز جلدی سمٹ سکتی تھی تاہم کوئی بھی فیلڈر جان بوجھ کر کیچ نہیں چھوڑنا چاہتا، میری غلطی تھی جس کو تسلیم کرتا ہوں۔

عبداللہ شفیق نے کہا کہ میلبرن ٹیسٹ جیتنے کیلئے ہر کھلاڑی کوشش کررہا ہے لیکن کچھ چیزیں ہمارے ہاتھ میں نہیں ہوتیں، بابراعظم ایک بہترین بلے باز ہیں تاہم نیٹس میں جس طرح وہ پریکٹس کرتے ہیں، میدان پر نہیں کھیل پارہے۔ یقیناً وہ اسوقت فارم میں نہیں تھے، البتہ امید ہے کہ وہ دوسری اننگز میں بڑا اسکور کریں گے۔

نوجوان کرکٹر نے آسٹریلوی کپتان کی تعریف کرتے ہوئے کہا کہ پیٹ کمنز کے اسپیل کا وہ آخری اوور تھا اگر کھیل جاتا تو آسٹریلیا پر پریشر بن سکتا تھا لیکن بدقسمتی سے گیند ہوا میں بلند ہوگئی۔