مودی نے بابری مسجد کے ملبے پر رام مندر کا افتتاح کرکے انتخابی مہم کا آغاز کردیا۔

بھارت کی سیکولر روایات کو دفن کرتے ہوئے مودی نے رام راج کا آغاز کردیا ہے جس کی تازہ مثال ایودھیا میں بابری مسجد کے ملبے پر رام مندر کا افتتاح ہے۔

نریندر مودی نے درحقیقت رام جنم بھومی مندر نہیں بلکہ ہندو راشٹر کا افتتاح کیا ہے جب کہ اس موقع پر رام مندر میں 51 انچ بلند رام کی مورتی کی ’’پران پرتھشٹا‘‘ کی گئی۔

ایودھیا میں 7 ہزار خصوصی مہمانوں اور ہزاروں عقیدت مندوں کے سامنے خصوصی پوجا پاٹ کا اہتمام کیا گیا، نریندر مودی نے ہندو پروہتوں کے طے کردہ انتہائی مقدس لمحات میں مندر کا افتتاح کیا۔

تقریب کے پیش نظر بھارت کی کئی ریاستوں اور مرکزی حکومت کے دفاتروں میں آدھے دن کی چھٹی کا اعلان کیا گیا تھا۔

علاوہ ازیں کئی ریاستوں کے اسکولوں میں چھٹی تو کئی اسکولوں میں آدھے دن کی چھٹی ہے جب کہ تمام بینکس اور انشورنس کمپنیاں بھی آدھے دن کے لیے بند ہیں۔

ہماچل پردیش اور گوا میں تمام سرکاری اور نیم سرکاری سمیت خود مختار اداروں میں آج مکمل چھٹی ہوگی، مختلف ریاستوں کے اسپتالوں میں بھی آدھے دن کی چھٹی ہے تاہم ایمرجنسی سروسز جاری رہیں گی۔

دوسری جانب پوجا کی تقریب کا 4 بڑے ہندو پنڈتوں سمیت کانگریس پارٹی اور مغربی بنگال کی وزیراعلیٰ ممتا بینرجی نے بھی بائیکاٹ کیا۔

یاد رہے کہ بھارتی شہر ممبئی میں تاریخی بابری مسجد کو شہید کرکے بنائے گئے ہندو مندر کے افتتاح سے قبل مسلمانوں اور ہندوؤں کے درمیان جھڑپیں ہوئیں۔

مہاراشٹر میں جاری ہندو ریلی کے دوران مسلمان اور ہندو انتہا پسند آمنے سامنے آگئے جب کہ ہندو انتہا پسند ہجوم نے مسلمانوں پر تشد اور پتھراؤ کیا۔

واضح رہے کہ بابری مسجد کو انتہا پسند ہندوؤں نے 1992ء میں شہید کردیا تھا جس کی جگہ اب رام مندر تعمیر کیا گیا ہے۔