متحدہ عرب امارات نے عرب دنیا کے پہلے خلاء باز سلطان النیادی کو نوجوانوں کا وزیر مقرر کر دیا ہے۔

عرب میڈیا کے مطابق متحدہ عرب امارات کے نائب صدر اور وزیر اعظم شیخ محمد بن راشد المکتوم نے آج حکومتی کابینہ میں تبدیلیاں کرتے ہوئے عرب کے پہلے خلاء باز سلطان النیادی کو وزیر برائے نوجوان مقرر کر دیا ہے۔

متحدہ عرب امارات کے نائب صدر اور وزیر اعظم شیخ محمد بن راشد المکتوم نے سوشل میڈیا پر پوسٹ کرتے ہوئے کہا کہ سلطان النیادی نے فوجی اور خلائی شعبے میں اپنے ملک کی خدمت کرنے کے ساتھ ساتھ سائنسی میدان میں انسانیت کی خدمت کی ہے۔

انہوں نے مزید کہا کہ عوامی نامزدگیوں نے انتخاب کے عمل میں کردار ادا کیا اور کہا کہ سلطان النیادی اپنی نئی ذمہ داریوں کے علاوہ اپنے سائنسی اور خلائی فرائض انجام دیتے رہیں گے۔

سلطان النیادی بین الاقوامی خلائی اسٹیشن پر چھ ماہ گزارنے والے پہلے عرب خلاباز تھے۔

انھوں نے ناسا کے خلاباز اسٹیفن بووین اور ووڈی ہوبرگ اور روسکوسموس کے خلاباز آندرے فیڈیف کے ساتھ مل کر ناسا کے اسپیس ایکس کریو-6 مشن کے حصے کے طور پر 200 سے زیادہ سائنسی تجربات اور ٹیکنالوجی کے مظاہرے کیے، جو 2 مارچ 2023 کو فلوریڈا کے کینیڈی اسپیس سینٹر سے روانہ ہوا تھا۔