آئی ایم ایف نے پاکستان کی نئی حکومت کے ساتھ کام کرنے پر آمادگی کا اظہار کردیا۔

عالمی مالیاتی فنڈ (آئی ایم ایف) کی جانب سے بانی پی ٹی آئی کے خط کے معاملے پر تبصرے سے گریز کرتے ہوئے خط کو سیاسی معاملہ قرار دے دیا۔

ڈائریکٹر کمیونیکیشن آئی ایم ایف جولی کوزیک کا کہنا تھا آئی ایم ایف اندرونی سیاسی معاملات پر بیان نہیں دیتا، نئی منتخب حکومت کے ساتھ معاشی استحکام کے لیے کام کرنا چاہتے ہیں۔

انہوں نے کہا کہ پاکستان میں میکرو اکنامک استحکام کو یقینی بنانے کے لیے نئی حکومت کے ساتھ پالیسیوں پر کام کرنے کے منتظر ہیں، آئی ایم ایف پاکستان میں غریب طبقات کے تحفظ کو یقینی بنانا چاہتا ہے۔ امید ہے نئی منتخب حکومت مہنگائی میں کمی کے لیے سخت مانیٹری پالیسی اختیار کرے گی۔

آئی ایم ایف نے بانی پی ٹی آئی کی جانب سے مبینہ انتخابی دھاندلیوں کو جواز بنا کر آئی ایم ایف کو خط لکھنے اور امداد دھاندلیوں کی عدلیہ سے تحقیقات مشروط کیے جانے کا بھی صاف جواب دیا۔ جولی کوزیک کا کہنا تھا کہ وہ جاری سیاسی امور پر تبصرہ نہیں کریں گی۔

خیال رہے کہ بانی پی ٹی آئی نے آئی ایم ایف کو خط لکھے جانے کی تصدیق کرتے ہوئے کہا تھا کہ آئی ایم ایف کو خط آج چلا گیا ہوگا۔

خط میں آئی ایم ایف کو کہا گیا کہ اگر ایسے حالات میں ملک کو قرضہ ملا تو قرضے کو واپس کون کرے گا، اس قرض سے غربت بڑھے گی، جب تک سرمایہ کاری نہ ہو قرض بڑھتا چلا جائے گا۔

دوسری جانب مسلم لیگ (ن) اور پیپلزپارٹی کی جانب سے پاکستان تحریک انصاف کے بانی کی جانب سے عالمی مالیاتی فنڈ (آئی ایم ایف) کو خط لکھنے کی مذمت کی گئی ہے۔