وفاقی وزیرداخلہ محسن نقوی پشاور میں سی ٹی ڈی ہیڈ کوارٹر پہنچ گئے۔
دورے کے دوران وفاقی وزیر داخلہ محسن نقوی نے سی ٹی ڈی ہیڈکوارٹر میں ڈیٹا سنٹر، کرائم سین یونٹ، سی آئی اے یونٹ اور دیگر شعبوں کا وزٹ کیا
وفاقی وزیر داخلہ محسن نقوی کی زیر صدارت سی ٹی ڈی ہیڈ کوارٹر میں اہم اجلاس بھی منعقد کیا گیا، جس میں سی ٹی ڈی خیبرپختونخوا کی استعدادکار بڑھانے کا فیصلہ کیا گیا۔
اجلاس میں نیکٹا کے سربراہ رائے طاہر۔ انسپکٹرجنرل پولیس اختر حیات گنڈاپور اور سی ٹی ڈی کے حکام نے شرکت کی۔
سی ٹی ڈی خیبرپختونخوا کے سربراہ ایڈیشنل آئی جی شوکت عباس نے ادارے کی کارکردگی کے بارے بریفنگ دی۔
محسن نقوی نے کہا کہ سی ٹی ڈی خیبرپختونخوا کو ضروری ڈیٹا تک رسائی کی سہولت دی جائے گی، خیبرپختونخوا دہشتگردی کے خلاف جنگ میں فرنٹ فٹ پر ہے۔
انہوں نے کہا کہ سی ٹی ڈی خیبرپختونخوا کے سائبر سیل کو وسعت دی جائے گی اور ہر ممکن معاونت کریں گے جبکہ ڈیٹا شئیرنگ کا موثر میکنزم بنایا جائے گا۔
وزیر داخلہ نے کہا کہ سی ٹی ڈی نے دہشتگردی کے خلاف جنگ میں ہراول دستے کا کردار ادا کیا ہے۔ خیبرپختونخوا میں سی ٹی ڈی کا ادارہ موثر انداز میں کام کر رہا ہے۔ قوم کو اپنے بہادر سپوتوں پر ناز ہے۔
آئی جی خیبرپختونخوا نے وفاقی وزیرداخلہ محسن نقوی کو دہشتگردوں کے خلاف آپریشن کے بارے بریفنگ دی۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News