کوئٹہ: وزیر اعلیٰ بلوچستان سرفراز بگٹی کہتے ہیں کہ سی پیک منصوبے پاکستان اور بلوچستان کی ترقی کے ضامن ہیں۔

وزیراعلیٰ بلوچستان سرفراز بگٹی کی زیر صدارت گوادر میں اعلٰی سطحیٰ اجلاس ہوا جس میں رکن بلوچستان اسمبلی مولانا ہدایت الرحمٰن، چیف سیکرٹری بلوچستان شکیل قادر خان نے بھی شرکت کی۔

اجلاس میں امن و امان اور گوادر سیف سٹی منصوبے کی پیش رفت کا جائزہ لیا گیا، گوادر شہر میں نکاسی آب سے متعلق اقدامات پر جی ڈی اے حکام نے بھی بریفنگ دی جب کہ سیکرٹری فشریز نے ماہی گیروں کو درپیش مسائل اور حکومتی اقدامات پر اجلاس کو بریف کیا۔

وزیر اعلٰیٰ بلوچستان میر سرفراز بگٹی کا کہنا ہے کہ دہشت گردی کی عفریت کا خاتمہ کریں گے،  سی پیک منصوبے پاکستان اور بلوچستان کی ترقی کے ضامن ہیں۔

وزیر اعلٰیٰ بلوچستان نے کہا کہ منصوبوں پر کام کرنے کے لئے چینی ماہرین اور تمام ورکرز کی فول پروف سیکیورٹی کو یقینی بنایا جا رہا ہے، گوادر سیف سٹی منصوبے پر کام کی رفتار کو تیز کردیا گیا ہے۔

میر سرفراز بگٹی کا کہنا تھا کہ بحالی امن پہلی ترجیح ہے، دہشت گردی کا مقابلہ پوری قوت سے کریں گے۔ پاک فوج سمیت تمام سیکیورٹی فورسز اور پوری قوم نے ثابت قدمی سے دہشت گردی کا مقابلہ کیا ہے۔

انہوں نے مزید کہا کہ گوادر کی ترقی کے لئے وفاقی اور صوبائی حکومتیں تمام دستیاب وسائل بروئے کار لاررہی ہیں، بارشوں سے متاثرہ علاقوں میں بحالی منصوبوں پر کام جاری ہے جب کہ متاثرین کی مکمل بحالی تک انہیں تنہا نہیں چھوڑیں گے۔