پاکستان سپر لیگ سیزن 9 کے ایلیمینیٹر ٹو میں اسلام آباد یونائیٹڈ نے پشاور زلمی کو 5 وکٹوں سے شکست دے دی۔

کراچی کے نیشنل اسٹیڈیم میں ہونے والے پی ایس ایل 9 کے اس میچ میں یونائیٹڈ نے زلمی کا 186 رنز کا ہدف 6 گیند قبل ہی پورا کر کے فائنل کے لیے ٹکٹ کٹوا لیا۔

اسلام آباد یونائیٹڈ کے اوپنر مارٹن گپٹل 34 رنز بنا کر آؤٹ ہوئے جبکہ ایلکس ہیلز 1 رنز بنا سکے۔

عماد وسیم نے 59 رنز ناٹ آؤٹ کی شاندار اننگ کھیل کر ٹیم کی کامیابی میں اہم کردار ادا کیا۔ عماد وسیم کا حیدر علی نے بھرپور ساتھ دیا اور وہ بھی 52 رنز پر ناقابل شکست رہے۔

پشاور زلمی کی جانب سے صائم ایوب نے 2 وکٹیں حاصل کیں، جبکہ لوک ووڈ، مہران ممتاز اور خرم شہزاد نے 1،1 کھلاڑی کو آؤٹ کیا۔

اس سے قبل اسلام آباد یونائیٹڈ نے ٹاس جیت کر پشاور زلمی کو پہلے بیٹنگ کی دعوت دی۔

پشاور زلمی نے مقررہ 20 اوورز میں 5 وکٹوں کے نقصان پر 185 رنز بنائے۔

زلمی کے اوپنر صائم ایوب نے شاندار بیٹنگ کی اور 44 گیندوں پر 73 رنز کی خوب صورت اننگ کھیلی، ان کی اس اننگ میں 4 چھکے اور 6 چوکے شامل تھے۔

بابر اعظم نے 25 رنز بنائے، محمد حارث نے 40 رنز کی اننگ کھیلی۔

ٹام کوہلر کیڈمور نے 18 اور عامر جمال نے 17 رنز ناٹ آؤٹ کی اننگ کھیلی۔

اسلام آباد یونائیٹڈ کی جانب سے نسیم شاہ نے 3 کھلاڑیوں کو آؤٹ کیا، جبکہ عبید میکوئے اور شاداب خان نے 1،1 کھلاڑی کو آؤٹ کیا۔