نیپال کے کرکٹر نے ٹی ٹوئنٹی انٹرنیشنل میں تاریخ رقم کرتے ہوئے ایک اوور میں 6 چھکے لگا دیئے۔

تفصیلات کے مطابق نیپال کے جارح مزاج بیٹسمین دیپندر سنگھ ایری نے ٹی ٹوئنٹی انٹرنیشنل کے ایک اوور میں 6 چھکے لگا کر مختصر فارمیٹ میں 6 چھکے لگانے والے تیسرے کرکٹر کا خطاب اپنے نام کر لیا۔

قطر کے خلاف اے سی سی پریمیئر کپ میں نیپال کے کرکٹر دیپندر سنگھ ایری نے یہ تاریخ ساز کارنامہ انجام دیا۔

قطر کے بولر کامران خان نیپالی بیٹر کے بلے کا شکار بنے جن کی بدقسمتی آج آسمان سے باتیں کر رہی تھی، یہ اننگ کا آخری اوور بھی تھا۔

چھکوں کی برسات شروع کرنے سے قبل دیپندر سنگھ ایری 15 گیندوں پر 28 رنز بنا سکے تھے، لیکن جب انہوں نے آخری اوور کی چھ گیندوں کو سامنا کیا تو اس کے بعد ان کے کھاتے میں 21 گیندوں پر 64 رنز کا ہندسہ سج چکا تھا۔

دیپندر سنگھ ایری نے بھارت کے یورواج سنگھ اور ویسٹ انڈیز کے کیرون پولارڈ کے کلب کو جوائن کر لیا ہے جو ٹی ٹوئنٹی انٹرنیشنل کرکٹ میں اس سے قبل ایک اوور میں 6 چھکے لگا چکے ہیں۔

نیپالی بیٹر ٹی20 انٹرنیشنل میں یہ کارنامہ انجام دینے والے تیسرے کھلاڑی ہیں۔

اس سے قبل بھارت کے یووراج سنگھ اور ویسٹ انڈیز کے کیرون پولارڈ بھی ٹی20 انٹرنیشنل میں ایک اوور میں 6 چھکے لگا چکے ہیں۔