ویسٹ انڈیز کی ویمنز کرکٹ ٹیم نے مسلسل تیسرے ون ڈے میں پاکستان ویمنز کرکٹ ٹیم کو 88 رنز سے شکست دے دی۔

تفصیلات کے مطابق کراچی میں تین میچز کی ون ڈے سیریز کے تیسرے میچ میں ویسٹ انڈیز ویمنز کرکٹ ٹیم نے پاکستان کو شکست دے کر سیریز میں وائٹ واش سے دوچار کر دیا۔

کراچی کے نیشنل بنک ارینا کرکٹ اسٹیڈیم میں ون ڈے سیریز کے آخری میچ میں ویسٹ انڈیز ویمنز نے ٹاس جیت کر پہلے بیٹنگ کا فیصلہ کیا جو سود مند ثابت ہوا۔

مہمان ٹیم نے مقررہ 50 اوورز میں 6 وکٹوں کے نقصان پر 278 رنز کا پہاڑ جیسا مجموعہ اسکور بورڈ پر سجا دیا۔

ویسٹ انڈیز ویمنز ٹیم کی اننگ کی خاص بات ان کی کپتان ہیلی میتھیوز کی شاندار بیٹنگ تھی، انہوں نے اس میچ میں شاندار 141 رنز کی اننگ کھیل کر سیریز کی دوسری سنچری اسکور کی، جبکہ اسٹیفنی ٹیلرز نے 47 رنز بنائے۔

پاکستان ویمنز کرکٹ ٹیم کی جانب سے نشرہ سندھو نے 3 وکٹیں حاصل کیں، جبکہ فاطمہ ثنا نے 2 وکٹوں کے ساتھ 50 وکٹوں کا سنگ میل عبور کیا۔

ہدف کے تعاقب میں پاکستان ویمنز کرکٹ ٹیم کی بیٹنگ لائن بری طرح فلاپ ہو گئی، اور 48 ویں اوور میں 190 رنز پر ڈھیر ہو گئی۔

عالیہ ریاض 36 اور منیبہ علی 38 رنز بنا کر نمایاں رہیں، جبکہ طوبیٰ حسن اور فاطمہ ثنا نے 23،23 رنز بنائے۔

ویسٹ انڈیز ویمنز کی جانب سے ہیلی میتھیوز اور اسٹیفنی نے 2،2 کھلاڑیوں کو آؤٹ کیا۔